პუბლიკაციები
კობა დავითაშვილი: „დღეს საქართველო ამერიკის პროტექტორატია. კოალიცია „ნაცმოძრაობის“ და “ევროპის სახალხო პარტიისგან“ დაკომპლექსებულია. და მერაბიშვილი არ არის ისეთი მომხიბვლელი, როგორიც ტიმოშენკოა!“

1-koba-1-a-1-mtსაქართველო, 3 ივნისი, საქინფორმი. საინფორმაციო ანალიტიკური სააგენტო საქინფორმის სტუმარია საქართველოს პარლამენტის წევრი, „ხალხის პარტიის“ ლიდერი კობა დავითაშვილი.  

- ბატონო კობა, „ერთიანი ნაციონალური მოძრაობის“ გენერალური მდივნის ვანო მერაბიშვილის დაკავებას დიდი რეზონანსი და არაერთგვაროვანი გამოხმაურება მოჰყვა. საზოგადოების დიდ ნაწილს მიაჩნია, რომ ეს ფაქტი სამართლიანობის აღდგენისკენ წინგადადგმული ნაბიჯია, საპარლამენტო უმცირესობა კი ხელისუფლებას პოლიტიკურ ზეწოლაში ადანაშაულებს, ხოლო ევროპა თავის უკმაყოფილებას გამოხატავს.  

თქვენ როგორ შეაფასებთ მერაბიშვილის დაკავებას?

- „ევროპა უკმაყოფილებას გამოხატავს“ - ძალიან სახალისო ფრაზაა, რადგან ევროპარლამენტის ერთი დეპუტატი გამოვიდა და მთელი ევროკავშირის სახელით ილაპარაკა. მე რატომღაც არ მახსოვს, რომ ეს ბატონი ვინმეს მთელი ევროკავშირის სახელით ლაპარაკის უფლებით აღეჭურვოს. არც ბატონი მარტენსი წარმოადგენს მთელ ევროპას, ის დიდი ხანია მიხეილ სააკაშვილის ლობისტია და იმაზე ნერვიულობს, თუ როგორ აუხსნას საკუთარ ამომრჩევლებს ის ფაქტი, რომ წლების მანძილზე სააკაშვილის დიქტატორულ რეჟიმს მხარს უჭერდა. ამიტომაც მათ მოწოდებებს ჩვენ არ ავყვებით.

მეორე - მერაბიშვილი აქამდე უნდა დაეჭირათ. მის მიმართ თანამდებობრივი უფლებამოსილების ბოროტად გამოყენებისა და ძალაუფლების გადამეტების თვალსაზრისით დიდი ხანია არსებობს ძალიან სერიოზული ბრალდებები. მინდა გითხრათ, მე უკმაყოფილო ვარ მერაბიშვილისთვის წაყენებული ბრალის სიმწირით. აქედან გამომდინარე, მაქვს პრეტენზიები ხელისუფლებასთან და გამოძიებასთან -  რატომ არ აქვს მას წაყენებული ბრალი იმ სხვა დანაშაულებისათვის, რომლებიც საზოგადოებისთვის კარგად არის ცნობილი?! ხალხს გაუხარდა მერაბიშვილის დაჭერა - უამრავი ადამიანი ზეიმობს, ბევრმა ცხვარიც კი დაკლა (იცინის).

- მიხეილ სააკაშვილი ვანო მერაბიშვილის დაკავებას გამოეხმაურა და განაცხადა, რომ ასეთი რანგის ჩინოვნიკის დაკავება უარყოფითად იმოქმედებს საქართველოს საერთაშორისო იმიჯზე და შეაფერხებს ქვეყნის ინტეგრაციას ევროსტრუქტურებში, როგორც ეს მოხდა უკრაინაში იულია ტიმოშენკოს დაკავების შემდეგ.

1-koba-shua

როგორ ფიქრობთ, შესაძლებელია თუ არა პარალელების გავლება ტიმოშენკოსა და მერაბიშვილის დაკავებებს შორის?

- მეეჭვება, რომ მერაბიშვილის დაკავებამ ხელი შეუშალოს ქვეყანას ევროპაში ინტეგრაციის პროცესში. და მერაბიშვილი ნამდვილად არ არის ისეთი მომხიბვლელი, როგორიც ტიმოშენკოა - ყველა გაგებით (იცინის).

- არასაპარლამენტო ოპოზიცია დიდი ხანია უშედეგოდ ითხოვს სპეციალური საპარლამენტო კომისიის შექმნას, რომელიც გამოიძიებს ისეთ გახმაურებულ საქმეებს, როგორიც არის 7 ნოემბრის, 26 მაისის აქციების დარბევა და სხვა.  

როგორ ფიქრობთ, რატომ ვერ ხერხდება აღნიშნული კომისიის შექმნა?

- ვეთანხმები არასაპარლამენტო ოპოზიციას. სამწუხაროდ, ამ თვალსაზრისით სამართალდამცავების მხრიდან ძალიან დიდი პასიურობაა. არ ვიცი, ბევრი საქმე დაუგროვდათ, პროფესიონალიზმი არ ჰყოფნით თუ ძირითადად ძველ კადრებს ეყრდნობიან, რომლებიც თვითონ მონაწილეობდნენ სხვადასხვა დანაშაულში, მაგრამ ფაქტია, რომ ჯერჯერობით ვერ მოხერხდა ამ საქმეების გახსნა. რა თქმა უნდა, სასამართლოსაც თავისი წვლილი შეაქვს ამ პროცესში. 7 ნოემბრის აქციის დარბევის გამოძიება ჯერ დაწყებულიც კი არ არის. ამიტომაც, ბუნებრივია, ეს მოთხოვნა სამართლიანია. მე დავაყენებ აღნიშნულ საკითხს პარლამენტში.

- რაც შეეხება საპრეზიდენტო არჩევნებს, თქვენთვის რამდენად მისაღებია კოალიცია „ქართული ოცნების“ საპრეზიდენტო კანდიდატი?

- გადაწყვეტილება მე არ მიმიღია. როგორც იცით, მე ვარ „ხალხის პარტიის“ თავმჯდომარე, რომელიც თავის დროზე კოალიცია „ქართულ ოცნებაში“ არ მიუღიათ - აქედან გამომდინარე, არც პოლიტსაბჭოში ვარ წარმოდგენილი. ამიტომაც მარგველაშვილის არც კრიტიკას ვაპირებ და არც თავგადაკლულ ქებას.

- ის მაინც გვითხარით, თქვენი აზრით, რა შანსი აქვს გიორგი მარგველაშვილს პრეზიდენტის პოსტის დასაკავებლად?

- უკომენტაროდ! მე შემიძლია ჩავერიო მხოლოდ იმ პროცესებში, რომლებშიც ვმონაწილეობ.

- ლაპარაკია იმაზეც, რომ არასაპარლამენტო ოპოზიცია გეგმავს კონსულტაციების გამართვას და ერთიანი საპრეზიდენტო კანდიდატის დაყენებას. როგორ ფიქრობთ, შეძლებს თუ არა არასაპარლამენტო ოპოზიცია ღირსეული კანდიდატის წამოყენებას, რომელიც კოალიცია „ქართული ოცნების“ საპრეზიდენტო კანდიდატს დაუპირისპირდება?

- ვერ გეტყვით. ჯერჯერობით არასაპარლამენტო ოპოზიციამ ვერ მოახერხა გაერთიანება. ამის მაგალითი იყო შუალედური არჩევნები, სადაც გაერთიანების შემთხვევაში შესაძლებელი იყო არჩევნების მოგება. სამწუხაროდ, ოპოზიციის ერთობის პერსპექტივას ვერც საპრეზიდენტო არჩევნებზე ვხედავ.

- ბატონო კობა, თქვენ ერთადერთი პოლიტიკოსი ხართ კოალიცია „ქართულ ოცნებაში“, რომელიც საკუთარ განსხვავებულ აზრს ყოველთვის ღიად აფიქსირებს. ამის გამო რამდენჯერმე არასასიამოვნო ვითარებაშიც აღმოჩნდით...

- „მართლის მთქმელს ცხენი სულ შეკაზმული უნდა ჰყავდესო“ - არ გაგიგიათ? მე მანქანა მყავს დაქოქილი (იცინის).

- იმ სატელევიზიო კონფლიქტის შემდეგ ბიძინა ივანიშვილს თუ შეხვდით?

- კონფლიქტები ხელს  არ გვიშლის მუშაობაში. იმ ფაქტის შემდეგ რამდენჯერმე შევხვდით ერთმანეთს და ვისაუბრეთ.

- შრომის კოდექსთან დაკავშირებითაც აღმოჩნდით გარკვეულ გაუგებრობაში...

- დიახ, ფრიად უცნაურ დღეში აღმოვჩნდი, როცა მთავრობისგან ვიცავდი მთავრობისვე კანონპროექტს. მსგავსი რამ ჩემს პოლიტიკურ ცხოვრებაში კი არა, მსოფლიო პრაქტიკაში არ ყოფილა. მთავრობამ სხდომაზე დაამტკიცა კანონპროექტი, შემოიტანა პარლამენტში, სადაც შევიტანეთ ცვლილებები და ხმა მივეცით. მერე გამოვიდა ჩვენი მთავრობის ვიცე-პრემიერი და ამ კოდექსს თავს დაესხა - მე დავიცავი აღნიშნული პროექტი. ამის შემდეგ გამოვიდა პრემიერ-მინისტრი და დაიცვა ვიცე-პრემიერის პოზიცია. ძალიან დავიბენი (იცინის). აღარ ვიცი უკვე, მთავრობის პროექტი რომ შემოვა, ეტყობა, ჯერ კარგად უნდა ჩავეკითხო, ნამდვილად უჭერენ თუ არა მხარს და მხოლოდ შემდეგ მივცე ხმა - სასაცილოა ეს ყველაფერი, სატირალი რომ არ იყოს.

- ბატონო კობა, ოპონენტები ივანიშვილის მთავრობას ხშირად ადანაშაულებენ ქვეყნის საგარეო კურსის ცვლილებაში. თქვენ როგორ ფიქრობთ, რამდენად სამართლიანია ეს ბრალდება?

- ეს ცვლილება სასურველი იქნებოდა, მაგრამ, სამწუხაროდ, საქართველოს საგარეო პოლიტიკური კურსი არ შეცვლილა. მე ვერ ვხედავ, რომ ევროპა და ამერიკა დიდი სურვილით იწვოდნენ, რომ ან ევროკავშირში მიგვიღონ, ან ნატოს წევრი ქვეყანა გავხდეთ. მე ვხედავ, რომ რუსეთი ყოველთვის ახერხებს მოელაპარაკოს ევროპის ერთ ან რამდენიმე ქვეყანას და თამაშგარე დაგვტოვოს. ევროკავშირის პერსპექტივა, ბევრი სხვადასხვა ფაქტორის გამო, ძალიან შორეული მეჩვენება. რაც შეეხება ნატოს, ყველა მხარზე ხელს გვითათუნებს, გვამხნევებს და გვეუბნება, რომ ნატოს კარი საქართველოსთვის ღიაა, მერე კი აღმოჩნდება, რომ გერმანია გაზის კონტრაქტს იღებს, საფრანგეთი - სამხედრო გემის კონტრაქტს, ამერიკა - ავღანეთზე მიმავალ გზას და ა.შ. გამოდის, რომ  საქართველოს სახელით ყველა ვაჭრობს. ხომ არ ჯობია, ჩვენ თვითონ ვევაჭროთ?! ჩემი აზრით, ქვეყნის საგარეო კურსთან დაკავშირებით საქართველოს ახალი ხელისუფლება მიჰყვება „ერთიანი ნაციონალური მოძრაობის“ მიერ გაკვალულ გზას და საერთოდ არ მესმის, რა პრეტენზიები აქვთ  „ნაციონალებს“?!

- უკი ნატოში მაინც არ მიგვიღებენ, მაშინ გამოდის, რომ ავღანეთში ქართველი ჯარისკაცები სულ ტყუილად იღუპებიან?!

- ეს ჩვენი ისტორიული უბედურებაა - ხან სპარსეთის დროშით ვიბრძოდით, ხან საბჭოთა კავშირის დროშით და დღეს უკვე ავღანეთში ამერიკის დროშით ვიბრძვით. ამის მიზეზი ის არის, რომ საქართველო არასოდეს ყოფილა დამოუკიდებელი. დღესაც საქართველო არის ამერიკის შეერთებული შტატების პროტექტორატი.

მე არ მივეკუთვნები იმ პოლიტიკოსთა რიცხვს, რომლებიც ამბობენ, რომ ან რუსეთთან უნდა ვიმეგობროთ, ან ამერიკასთან. ჩემთვის სამაგალითო ჩვენი მეზობელი სომხეთის პოლიტიკაა, რომელიც ახერხებს ორივე სახელმწიფოსთან თანამშრომლობას. ყველასთან კარგი ურთიერთობა უნდა გვქონდეს ისე, რომ დაცული იყოს ჩვენი ეროვნული ინტერესები. ქვეყანაში უნდა არსებობდეს ისეთი ძალები, რომლებიც, ერთი მხრივ, ვაშინგტონს დაელაპარაკებიან, მეორე მხრივ - მოსკოვს, ჩამოიტანენ მათ წინადადებებს, შემდეგ კი ქართველმა ხალხმა უნდა გააკეთოს არჩევანი.

- როგორ ფიქრობთ, არსებულ ხელისუფლებას აქვს რესურსი, რომ ეს მოლაპარაკება აწარმოოს ორივე მხარესთან?

- „ქართულ ოცნებას“ აქვს ამის რესურსი, მაგრამ სამწუხაროდ, კოალიცია „ერთიანი ნაციონალური მოძრაობის“ და “ევროპის სახალხო პარტიისგან“ დაკომპლექსებულია. ჩვენი მთავარი ინტერესი არის ქვეყნის ტერიტორიული მთლიანობის აღდგენა. ამიტომ უნდა გავიგოთ რა სურს რუსეთს დეოკუპაციის სანაცვლოდ. თუ რუსეთს უნდა, რომ ვიქცეთ მის ნაწილად, აქედან არაფერი გამოვა, ხოლო თუ რუსეთი მზად არის, საქართველოს ტერიტორიული მთლიანობა აღადგინოს ისე, რომ ჩვენს დამოუკიდებლობას საფრთხე არ შეუქმნას და ამისათვის მხოლოდ ნეიტრალიტეტს ითხოვს - ეს ის  ფასია, რომელზეც დაფიქრება ღირს. ამიტომ მიმაჩნია, რომ ბიძინა ივანიშვილის შეხვედრა რუსეთის პრემიერთან ან პრეზიდენტთან რომელიმე მესამე ქვეყნის ტერიტორიაზე უნდა გაიმართოს.

ესაუბრა ნატა წერეთელი

P.S. 2008 წლის 18 მარტს გაერთიანებული ქართული ოპოზიციის ლიდერმა, ერთიანი ეროვნული საბჭოს წევრმა, “ხალხის პარტიის“ თავმჯდომარე კობა დავითაშვილმა საგანგებოდ РИА Новости-ს მისცა ინტერვიუ, რომელშიც, კერძოდ, ნეიტრალიტეტის ცნობილი მხარდამჭერის არნო ხიდირბეგიშვილის შეკითხვაზე - “დავუშვათ, რუსეთი შეცვლის თავის პოლიტიკას არაღიარებული რესპუბლიკების მიმართ. განუცხადებს თუ არა საქართველო ასეთ შემთხვევაში მსოფლიო საზოგადოებას, რომ უარს ამბობს ნატოზე და, მაგალითად, ნეიტრალური სახელმწიფო ხდება?“ - ბატონმა კობამ უპასუხა:

“იმისათვის, რომ ნეიტრალიტეტის პოლიტიკაზე გადავიდეთ, წლები კი არა, ათწლეულებია საჭირო. სამწუხაროდ, დღეს საქართველოს მხრიდან ასეთი კომპრომისი - ნატოში შესვლაზე უარის თქმა - შეუძლებელია. ერთმანეთი არ უნდა მოვატყუოთ: ეს ხომ ქართველი ხალხის გადაწყვეტილებაა, რადგან ნატოში შესვლას რეფერენდუმზე მოსახლეობის ორ მესამედზე მეტმა მისცა ხმა. მაგრამ, ამავე დროს, ნატოს წევრობა ხელს არ უშლის, მაგალითად, რუსეთ-საბერძნეთის შესნაიშნავ ურთიერთობას. თუმცა არის სხვა მაგალითებიც, როდესაც ნატოს ორ წევრს - თურქეთსა და საბერძნეთს შორის ფაქტობრივი სამხედრო კონფლიქტი არსებობს. ამიტომ არ მიმაჩნია, რომ საქართველოს ნატოში შესვლა ავტომატურად უნდა გულისხმობდეს რუსეთთან მტრულ ურთიერთობას.

სხვათაშორის, არ გამოვრიცხავ, რომ დროთა განმავლობაში ისეთ მსოფლიო წესრიგს მივაღწევთ, როდესაც საერთაშორისო ურთიერთობა აღარ განისაზღვრება ქვეყნების წევრობით ამა თუ იმ ორგანიზაციებსა და ბლოკებში“.

1-koba-bolo