საქართველო, 22 აგვისტო, საქინფორმი. პოლიტიკური სიტუაცია ამიერკავკასიაში ტრადიციულად ხასიათდება განსაკუთრებული დინამიზმით და, შედეგად, რთულად პროგნოზირებადია.

რუსეთის პრეზიდენტ ვლადიმერ პუტინის ვიზიტს ბაქოში, რომლის ფარგლებშიც „როსნეფტმა“ და SOCAR-მა ხელი მოაწერეს თანამშრომლობის ხელშეკრულებას, შეიძლება რეგიონისთვის ახალი ეტაპი ეწოდოს, რისი შედეგებიც საქართველოში მიხეილ სააკაშვილის ხელისუფლებიდან წასვლას უთანაბრდება.

რუსეთიდან ნავთობის ტრანსპორტირების პერსპექტივა ბაქო-თბილისი-ჯეიჰანის ნავთობსადენით უწინ ექსპერტების მიერ სერიოზულად არ განიხილებოდა. ერთ–ერთი წამყვანი რუსი ექსპერტის კონსტანტინ სიმონოვის შეფასებით, აღნიშნული შეთანხმება „საკმაოდ უცნაურია რუსეთის ინტერესების თვალსაზრისით“, რადგან რუსეთი ბაქო-თბილისი-ჯეიჰანის ნავთობსადენს საკმაოდ არამეგობრულ პროექტად განიხილავდა. აშშ კი ამ პროექტს მხარს უჭერდა.

ამავე დროს, საგულისმოა, რომ „როსნეფტის“ გზა ბაქო-თბილისი-ჯეიჰანის ნავთობსადენში მას შემდეგ გაიხსნა, რაც ამ მილსადენის ერთ-ერთი მთავარი მფლობელი, ბრიტანული „ბრითიშ პეტროლიუმი“ (BP) რუსეთის სახელმწიფოს შემდეგ „როსნეფტის“ მეორე უდიდესი აქციონერი გახდა (აქციების 20-პროცენტიანი წილით), შესაბამისად, „როსნეფტის“ შესვლა ბაქო-თბილისი-ჯეიჰანის ნავთობსადენში შესაძლებელი გახდა, როგორც მინიმუმ, BP -ს თანხმობით ან ეგებ მისი შეთავაზებითაც კი. ამ სიტუაციაში რუსეთის პოლიტიკური პოზიციების განმტკიცება აზერბაიჯანსა და საქართველოში დიდად სავარაუდოა, თუკი მხედველობაში მივიღებთ პრემიერ ივანიშვილისა და საქართველოს მთავრობის მისწრაფებას, მოსკოვთან ურთიერთობაში პატიდან გამოვიდეს.