საქართველო, 25 ოქტომბერი, საქინფორმი. ხუთშაბათს, 24 ოქტომბერს, 12:00 საათზე, თბილისში, სასტუმრო "ვერე პალასში" (ქუჩიშვილის ქ. №22-24) გაიმართა ერთიანი საქართველოსთვის მებრძოლთა კავშირის შეკრება, რომელიც რუსულ-ქართული ურთიერთობების თემატიკას მიეძღვნა. შეკრებილი საზოგადოება გამოეხმაურა რუსეთთან დიპლომატიური ურთიერთობების აღდგენის ინიციატივას და ამასთან დაკავშირებით, შემდეგი რეზოლუცია მიიღო:

ერთიანი საქართველოსთვის მებრძოლთა კავშირის განცხადება

ჩვენ, საქართველოს ერთიანობისთვის მებრძოლთა კავშირის წევრთა დღევანდელი შეკრების მონაწილენი, მივიჩნევთ, რომ ჩვენი ქვეყნის ერთიანობის მიზნიდან გამომდინარე, ხელისუფლების უმთავრესი პრიორიტეტი რუსეთთან ურთიერთობების სრულმასშტაბიანი დარეგულირება უნდა გახდეს.

მივესალმებით საქართველოს პრემიერ-მინისტრის, ბატონ ბიძინა ივანიშვლის მიერ ამ მხრივ გადადგმულ პირველ ნაბიჯებს, თუმცა აქვე აღვნიშნავთ, რომ პრემიერ-მინისტრის მიერ რუსეთთან დარეგულირების კურსს ბევრი მოწინააღმდეგე ჰყავს ქართულ პოლიტიკურ სპექტრში, მათ შორის, მის გარემოცვაში. საკმარისი არ არის მხოლოდ სააკაშვილის რეჟიმის რიტორიკაზე - რუსეთისა და მისი ხელისუფლების ლანძღვაზე უარის თქმა. პოლიტიკურ სტრატეგიას თავისი მოთხოვნები აქვს. საქართველო გვერდს ვერ აუვლის რუსეთთან მჭიდრო თანამშრომლობას, საკუთარი გეოგრაფიული და გეოსტრატეგიული მდებარეობიდან გამომდინარე: ჩვენ რუსეთი ან მუდამ მტრად გვეყოლება მოკიდებული, ან რუსეთის პარტნიორები და მეგობრები ვიქნებით. ალბათ რთული მისახვედრი არ უნდა იყოს, თუ ამ ორიდან რომელი ვარიანტი სჯობს საქართველოსთვის, მისი პოლიტიკური და ეკონომიკური ინტერესებისათვის. ბუნებრივია, საქართველოს ერთიანობის პრობლემაც, რუსეთის კეთილი ნების გარეშე, არ მოგვარდება.

უკვე დადგა დრო, საქართველოს ხელისუფლებამ გააღრმავოს რუსეთთან დარეგულირების პროცესი და დათანხმდეს დიპლომატიური ურთიერთობების აღდგენას. ამის გარეშე შეუძლებელი იქნება სრულყოფილი დიალოგის წარმოება და პრობლემების მოგვარება. დიპლომატიური ურთიერთობების აღდგენა არ ნიშნავს აფხაზეთის და ცხინვალის რეგიონის დამოუკიდებლობის ცნობას საქართველოს მიერ. პირიქით, საქართველოს დამატებითი და თან სერიოზული ბერკეტები ეძლევა პროცესებზე ზემოქმედების მოსახდენად. გვახსოვდეს, რომ საქართველოს მოძულეებს მხოლოდ საქართველოს რუსეთთან დაახლოებისა ეშინიათ! ბოლო 25 წლის მანძილზე საქართველო ორიენტირებულია დასავლეთზე, მაგრამ სწორედ ამ ორიენტაციის გამო დაინგრა მისი ტერიტორიული მთლიანობა, გაპარტახდა ეკონომიკა, ხალხის დიდი ნაწილი უცხოეთში გადაიხვეწა. დროა, გამოვფხიზლდეთ და მოვლენებს თავისი სახელი დავარქვათ!