საქართველო, 4 თებერვალი, საქინფორმი. ამის შესახებ პრეზიდენტმა გიორგი მარგველაშვილმა პარლამენტში ყოველწლიური მოხსენებით გამოსვლისას განაცხადა.
ქვეყნის პირველმა პირმა საქართველოს-რუსეთის ურთიერთობაზე საუბრისას "გაზპრომთან" მიმდინარე მოლაპარაკება ახსენა.
„რუსეთის ფედერაციასთან ეკონომიკური და, განსაკუთრებით, ენერგოთანამშრომლობა რბილი ძალის ნაწილია. მიწევს გავიმეორო - "გაზპრომი" არ არის მხოლოდ ენერგეტიკა. არ უნდა დავივიწყოთ, რომ რუსეთი ეკონომიკურ ბერკეტებს პოლიტიკური მიზნით იყენებს, ამიტომ "გაზპრომთან" მოლაპარაკება ქვეყნის უმაღლესი პოლიტიკური ხელმძღვანელობის მანდატით, დადგენილი წითელი ხაზების ფარგლებში, გამჭვირვალედ უნდა მიმდინარეობდეს", - განაცხადა პრეზიდენტმა.
გიორგი მარგველაშვილის თქმით, ის კვლავაც აქტიურად იქნება ჩართული ყველა იმ პროცესში, რომელიც უკავშირდება სტრატეგიულ მიზანს - "საქართველოს დაბრუნებას მის ისტორიულ ოჯახში - ევროპულ სახელმწიფოთა დიდ თავისუფალ გაერთიანებაში".