საქართველო, 16 აგვისტო, საქინფორმი. საქართველოს უმაღლეს სასწავლებლებში 2016-2017 სასწავლო წელს განათლება 8 ათასზე მეტმა უცხოელმა სტუდენტმა მიიღო, აღნიშნულია "საქსტატის" ვებგვერდზე განთავსებულ მონაცემებში. უცხოელ სტუდენტებს შორის რაოდენობრივად პირველ ადგილზე არიან აზერბაიჯანის მოქალაქეები — 2,6 ათასზე მეტი, აქედან 557 განათლებას სახელმწიფო უმაღლეს სასწავლებლებში იღებდა. შემდეგ მოდიან ინდოეთის მოქალაქეები — 2,5 ათასზე მეტი სტუდენტი, ერაყის — 974, ნიგერიის — 439 და თურქეთის — 360.
უცხოელი სტუდენტები საქართველოში, ძირითადად, უპირატესობას ანიჭებენ სოციალურ მეცნიერებებს, ბიზნესს, იურისპრუდენციასა და მედიცინას.
უცხოელ აბიტურიენტებს საქართველოს უმაღლეს სასწავლებელში სწავლისთვის მხოლოდ სრული საშუალო განათლების ატესტატის წარდგენა სჭირდებათ - მათთვის ერთიანი ეროვნული გამოცდების ჩაბარება საჭირო არ არის, თუ სწავლისთვის სახელმწიფო გრანტის მიღება არ სურთ. დაფინანსება შესაძლოა, 100%-იანიც იყოს.