საქართველო, 26 ივნისი, საქინფორმი. რამდენი რიტუალიც უნდა შეასრულო, თუ ეს მხოლოდ გარეგნულადაა სწორად ჩატარებული, უფალი წყალობას ვერ მოგცემს, – ამის შესახებ საპატრიარქო ტახტის მოსაყდრემ მეუფე შიომ სამების საკათედრო ტაძარში საკვირაო ქადაგებისას აღნიშნა.

მეუფე შიოს თქმით, არა რიტუალები, არამედ დიდი სიყვარული და ღრმა სარწმუნოება საწინდარია იმისა, რომ ღმერთმა თხოვნა შეგვისრულოს.

მისივე სიტყვებით, როდესაც ჩვენში სიძულვილი, უსიყვარულობაა, უფალი თხოვნას არ შეგვისრულებს.

„დღესაც ხშირია მსგავსი რჩევები, მოიარე ეკლესია ფეხშიშველმა, მოიარე სალოცავები, ჩაატარე რიტუალები, ასე გვგონია, რომ რიტუალების აღსრულებით ვემსახურებით ქრისტეს. რამდენი რიტუალიც არ უნდა შეასრულო, თუ ეს მხოლოდ გარეგნულადაა სწორად ჩატარებული, უფალი წყალობას ვერ მოგცემს. ან მწირ წყალობას მიიღებთ, რადგან ღმერთს უყვარს ყველა ადამიანი. ამაზე დავფიქრდეთ, რამე ხომ არაა ცხოვრებაში, რაც უნდა შევცვალოთ. ესაა პირადი, თუ თუნდაც საქვეყნო საქმეები.

როდესაც გვაქვს სიძულვილი, უსიყვარულობა უფალი ჩვენ თხოვნას არ შეასრულებს. შეიძლება სიძულვილის ნაცვლად იყოს გულგრილობა. თქვენც ხედავთ, როგორი ხშირია, როცა მასმედიაში და სოციალურ ქსელებში ვხედავთ ასეთ დიდ უსიყვარულობას, მოუფრთხილებლობას, სისასტიკეს, უხეშობას, უცენზურობას. აფექტის დროს შეიძლება წამოსცდეს ადამიანს მსგავსი სიტყვები, მაგრამ როცა წერს სოციალურ ქსელში ტექსტს, რომელიც სავსეა ზიზღით, როგორ შეიძლება ღმერთმა ასეთი თხოვნა შეუსრულოს, რა თქმა უნდა არა.

ასეთ ადამიანს შეიძლება მხოლოდ ჰქონდეს გამოხატვის თავისუფლება. ამითი იყოს კმაყოფილი, რომ ის ამ თავისუფლებას, როგორც თავად ჰგონია, ახორციელებს, მაგრამ სინამდვილეში ესაა მონობა. თავისუფლებაა, როდესაც დავძლევთ ჩვენს სიძულვილს, უხეშობას, უკულტურობას და ვიმარჯვებთ ამ თვისებებზე. შემდეგ ვიღებთ ღვთის მადლს“, - აღნიშნა მეუფე შიომ.