საზოგადოება
საქართველოში რუსეთის შეჭრიდან ათი წლის შემდეგაც გრძელდება აფხაზეთისა და „სამხრეთ ოსეთის“ ოკუპაცია - ეუთო-ში საქართველოს მეგობართა ჯგუფი

 საქართველო, 10 დეკემბერი, საქინფორმი. ვგმობთ, რომ საქართველოში რუსეთის შეჭრიდან ათი წლის შე​მდეგაც გრძელდება საქართველოს რეგიონების, აფხაზეთისა და „სამხრეთ ოსეთის“ ოკუპაცია, – ამის შესახებ აღნიშნულია ეუთო-ში საქართველოს მეგობართა ჯგუფის ქვეყნების ერთობლივ განცხადებაში.

განცხადება კეთდება ბულგარეთის, კანადის, ჩეხეთის, ესტონეთის, ლატვიის, ლიეტუვას, პოლონეთის, რუმინეთის, შვედეთის, უკრაინის, გაერთიანებული სამეფოსა და ამერიკის შეერთებული შტატების სახელით.

კიდევ ერთხელ ვადასტურებთ ჩვენს ურყევ მხარდაჭერას საქართველოს სუვერენიტეტისა და ტერიტორიული მთლიანობისადმი მის საერთაშორისოდ აღიარებულ საზღვრებში. ვგმობთ, რომ საქართველოში რუსეთის მიერ განხორციელებული შეჭრიდან ათი წლის შემდეგაც გრძელდება რუსეთის მიერ აფხაზეთისა და სამხრეთ ოსეთის რეგიონების ოკუპაცია, იმ ფონზე, როდესაც კონფლიქტით დაზარალებულ ადგილებში უსაფრთხოებისა და ჰუმანიტარული მდგომარეობა კიდევ უფრო უარესდება. გამოვხატავთ მტკიცე მხარდაჭერას ამ რეგიონების არაღიარების პოლიტიკისადმი და მოვუწოდებთ ეუთო- მონაწილე ყველა სახელმწიფოს, მოიქცნენ ამგვარად.

მოვუწოდებთ რუსეთის ფედერაციას, გააუქმოს საქართველოს რეგიონების, აფხაზეთისა და სამხრეთ ოსეთის .. დამოუკიდებლობის აღიარება. ხაზს ვუსვამთ კონფლიქტის მშვიდობიანად მოგვარების საჭიროებას, გაერო- ქარტიის, ჰელსინკის დასკვნითი ოქმისა და საერთაშორისო სამართლის ფუნდამენტური ნორმებისა და პრინციპების სრული პატივისცემით. მივესალმებით საქართველოს პროგრესს ქვეყნის დემოკრატიისა და კარგი მმართველობის გაძლიერების, ინსტიტუტების გამჭვირვალობის გაუმჯობესების, ადამიანის უფლებების განმტკიცების, ასევე, ევროპული და ევროატლანტიკური ინტეგრაციის პროცესისა და ეკონომიკური განვითარების გზაზე.

სამწუხაროა, რომ ამ უპირატესობებით ვერ სარგებლობს საქართველოს აფხაზეთისა და სამხრეთ ოსეთის რეგიონების მოსახლეობა. გვჯერა, რომ რუსეთ-საქართველოს კონფლიქტის მშვიდობიანი მოგვარება დიდ სასიკეთო გავლენას მოახდენს არა მხოლოდ საქართველოზე, არამედ მთლიანად რეგიონზე. გამოვხატავთ ღრმა შეშფოთებას რუსეთის მიერ გახშირებულ სამხედრო წვრთნებთან და საქართველოს აფხაზეთისა და სამხრეთ ოსეთის რეგიონებში დამატებითი სამხედრო შენაერთების განლაგებასთან დაკავშირებით“, – აღნიშნულია ეუთო-ში საქართველოს მეგობართა ჯგუფის ქვეყნების ერთობლივ განცხადებაში.

დოკუმენტის ავტორები აცხადებენ, რომ რუსეთის მხრიდან ევროკავშირის შუამდგომლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების მუდმივი დარღვევით ვითარება უარესდება და ზიანდება ის პრინციპები და ნორმები, რომლებზეც დამოკიდებულია ეუთო-ში საქართველოს მეგობართა ჯგუფის ქვეყნების უსაფრთხოება.

კიდევ ერთხელ ვადასტურებთ მტკიცე მხარდაჭერას ჟენევის საერთაშორისო მოლაპარაკებების, როგორც უნიკალური და მნიშვნელოვანი ფორმატისადმი, რომელიც პასუხობს რუსეთ-საქართველოს შორის არსებული მოუგვარებელი კონფლიქტიდან მომდინარე გამოწვევებს უსაფრთხოების, ადამიანის უფლებებისა და ჰუმანიტარული კუთხით. ვწუხვართ, რომ მოლაპარაკებების ძირითად საკითხებზე ვერ ხერხდება პროგრესის მიღწევა, მათ შორის, ძალის არგამოყენებისა და იძულებით გადაადგილებულ პირთა და ლტოლვილთა უსაფრთხო, ღირსეული და ნებაყოფლობითი დაბრუნების საკითხებზე და საქართველოს აფხაზეთისა და სამხრეთ ოსეთის რეგიონებში უსაფრთხოების საერთაშორისო მექანიზმების შექმნის საკითხზე, რომლითაც უზრუნველყოფილი იქნება ადგილზე უსაფრთხოება და სტაბილურობა.

ხაზს ვუსვამთ, რომ გადამწყვეტი მნიშვნელობა აქვს მონაწილეების მიერ კონფლიქტით დაზარალებულთა უსაფრთხოებისა და ჰუმანიტარული გამოწვევების კეთილსინდისიერად, გრძელვადიანად გადაჭრას და მოლაპარაკებების ძირითად საკითხებზე რეალური შედეგების მიღწევას. გამოვხატავთ მტკიცე მხარდაჭერას ინციდენტების პრევენციისა და მათზე რეაგირების მექანიზმებისადმი (IPRMs) და ხაზს ვუსვამთ მათ მნიშვნელოვან როლს კონფლიქტის გამწვავების პრევენციის საკითხში. უკიდურეს შეშფოთებას გამოვთქვამთ IPRM-ების უკანასკნელი შეხვედრების ჩაშლასთან დაკავშირებით როგორც გალში, ისე ერგნეთში და მოვუწოდებთ მონაწილეებს, დაუყონებლივ მოახდინონ მათი აღდგენა მექანიზმების დამფუძნებელი პრინციპებისა და წესების სრული დაცვით.

მოვუწოდებთ მონაწილეებს, გამონახონ კონფლიქტით დაზარალებული მოსახლეობის უსაფრთხოებისა და ჰუმანიტარული საჭიროებების გადაჭრის შესაბამისი გზები. ვაფასებთ ევროკავშირის სადამკვირვებლო მისიის (EUMM) წვლილს ადგილზე დაძაბულობის ესკალაციის აღკვეთაში და კიდევ ერთხელ მოვუწოდებთ რუსეთის ფედერაციას, დაუშვას EUMM საქართველოს ოკუპირებულ აფხაზეთისა და სამხრეთ ოსეთის რეგიონებში, რათა მისიამ სრულად განახორციელოს თავისი მანდატი“, – აღნიშნულია დოკუმენტის ტექსტში.

ეუთო-ში საქართველოს მეგობართა ჯგუფის ქვეყნების განცხადებაში ლაპარაკია არჩილ ტატუნაშვილის, გიგა ოთხოზორიასა და დავით ბაშარულის მკვლელობებზე და ხაზგასმულია, რომ მოუწოდებენ რუსეთის ფედერაციას, არ შეუქმნას დაბრკოლება გამოძიებას, რათა შესაძლებელი გახდეს დამნაშავეთა მართლმსაჯულების წინაშე წარდგენა.

ვგმობთ იძულებით გადაადგილებულ პირთაარჩილ ტატუნაშვილის, გიგა ოთხოზორიასა და დავით ბაშარულის მკვლელობებს და მოვუწოდებთ რუსეთის ფედერაციას, როგორც საქართველოს აფხაზეთისა და სამხრეთ ოსეთის რეგიონებში ეფექტური კონტროლის განმახორციელებელ სახელმწიფოს, არ შეუქმნას დაბრკოლება გამოძიებას, რათა შესაძლებელი გახდეს დამნაშავეთა მართლმსაჯულების წინაშე წარდგენა. ამ კონტექსტში ჩვენ მხარს ვუჭერთ საქართველოს მიერ გადადგმულ პრევენციულ ნაბიჯებს, რომელთა მიზანია დაუსჯელობის აღკვეთა და საქართველოს აფხაზეთისა და სამხრეთ ოსეთის რეგიონებში ადამიანის უფლებების დარღვევების აღმოფხვრა.

ჩვენ ვითვალისწინებთ ტატუნაშვილი-ოთხოზორიას სიის დამტკიცებასთან დაკავშირებით საქართველოს მთავრობის დადგენილებას, რომელიც საქართველოს პარლამენტის რეზოლუციას ეფუძნება. ღრმა შეშფოთებას გამოვთქვამთ აფხაზეთისა და სამხრეთ ოსეთის რეგიონებში მცხოვრები ეთნიკურად ქართველი მოსახლეობის დისკრიმინაციასთან დაკავშირებით და ვგმობთ ადამიანის უფლებების ხელყოფის ფაქტებს, მათ შორის, წამების შესახებ ბრალდებებს და სასტიკი ან დამამცირებელი მოპყრობისა ან დასჯის ფაქტებს, ასევე თავისუფალი გადაადგილების, ცხოვრების, საკუთრებისა და მშობლიურ ენაზე განათლების მიღების უფლებების შეზღუდვის შემთხვევებს“, – აღნიშნულია განცხადებაში.

ეუთო-ში საქართველოს მეგობართა ჯგუფის ქვეყნები შეშფოთებას გამოთქვამენ ე.წ. გადასასვლელი პუნქტების დახურვით გამოწვეული შედეგების გამო.

ვგმობთ იძულებით გადაადგილებულ პირთა საცხოვრებელი სახლების მასობრივი განადგურების ფაქტს, რაც აფხაზეთისა დასამხრეთ ოსეთისრეგიონებში ეთნიკურად ქართველი მოსახლეობისა და კულტურული მემკვიდრეობის კვალის სრული გაქრობისკენ რუსეთის მიზანმიმართული პოლიტიკის გამოხატულებაა. მხარს ვუჭერთ იძულებით გადაადგილებულ პირთა და ლტოლვილთა ნებაყოფლობით დაბრუნებას თავიანთი წარმოშობის ადგილებში.

ხაზგასმით აღვნიშნავთ, რომ მავთულხლართებისა და სხვა ხელოვნური ბარიერების აღმართვით საოკუპაციო ხაზის გამაგრების მიმდინარე პროცესი კიდევ უფრო ამძიმებს კონფლიქტით დაზარალებული მოსახლეობის ადგილზე არსებულ ჰუმანიტარულ მდგომარეობას. ამ კონტექსტში, მოვუწოდებთ რუსეთის ფედერაციას, შეფერხების გარეშე დაუშვას ადამიანის უფლებათა საერთაშორისო მონიტორინგის მექანიზმები აფხაზეთისა დასამხრეთ ოსეთისრეგიონებში. მხარს ვუჭერთ საქართველოს მთავრობის პოლიტიკას კონფლიქტის მშვიდობიან მოგვარებასთან დაკავშირებით. მივესალმებით საქართველოს მიერ ევროკავშირის შუამდგომლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების შესრულებას და მოვუწოდებთ რუსეთის ფედერაციას, პატივი სცეს მის მიერ აღებულ საერთაშორისო ვალდებულებებს და სრულად შეასრულოს ზემოხსენებული ცეცხლის შეწყვეტის შეთანხმება, მათ შორის, გაიყვანოს თავისი სამხედრო ძალები საქართველოს ოკუპირებული ტერიტორიებიდან“, – წერია განცხადებაში.

ასევე აღნიშნულია, რომ დოკუმენტის ხელმომწერი ქვეყნები მიესალმებიან ძალის არგამოყენების შესახებ საქართველოს მიერ აღებულ ცალმხრივ ვალდებულებას და მოუწოდებენ რუსეთის ფედერაციას, ნაცვალგების საფუძველზე მოიქცეს ამგვარადვე, დაადასტუროს და შეასრულოს ძალის არგამოყენების ვალდებულება.

მივესალმებით საქართველოს მთავრობის ძალისხმევას, რომელიც მიმართულია დაყოფილ საზოგადოებას შორის შერიგებისა და ნდობის აღდგენისაკენ. კიდევ ერთხელ ვუცხადებთ მხარდაჭერას საქართველოს მთავრობის სამშვიდობო ინიციატივას – „ნაბიჯი უკეთესი მომავლისკენ“, რომელიც მიზნად ისახავს დაყოფილ საზოგადოებას შორის ნდობისა და ურთიერთობის აღდგენას, ასევე, საქართველოს აფხაზეთისა და სამხრეთ ოსეთის რეგიონებში მცხოვრები მოსახლეობის ჰუმანიტარული და სოციალურ-ეკონომიკური მდგომარეობის გაუმჯობესებას.

მივესალმებით საქართველოს მთავრობის დიალოგის პოლიტიკას რუსეთის ფედერაციასთან, რომელიც მიმართულია დაძაბულობის დეესკალაციისკენ საქართველოს სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის სრული პატივისცემით. მოვუწოდებთ ეუთო-,კიდევ უფრო აქტიურად ჩაერთოს რუსეთ-საქართველოს კონფლიქტის მშვიდობიანად მოგვარებაში და ხელი შეუწყოს ომითა და საოკუპაციო ხაზით დაყოფილ საზოგადოებას შორის ნდობის აღდგენასა და ჩართულობას. მოვუწოდებთ ეუთო- მონაწილე სახელმწიფოებს, შეთანხმდნენ საქართველოში ეუთო- მრავალგანზომილებიანი მისიის გახსნაზე, კონფლიქტით დაზარალებული ადამიანების სასარგებლოდ, რომელსაც ექნება მონიტორინგის განხორციელების შესაძლებლობა როგორც აფხაზეთის, ისე სამხრეთ ოსეთის რეგიონებში.

მისია მნიშვნელოვნად გააძლიერებს ეუთო- ჩართულობას როგორც ჟენევის საერთაშორისო მოლაპარაკებებსა და ინციდენტის პრევენციისა და მათზე რეაგირების მექანიზმებში, ასევე ნდობის აღდგენის მექანიზმების განხორციელებაში. მეგობარი ქვეყნები ხაზს უსვამენ კონფლიქტის მშვიდობიანად მოგვარების აუცილებლობას, ასევე გამოხატავენ მზაობას, გააორმაგონ ძალისხმევა რუსეთ-საქართველოს კონფლიქტთან დაკავშირებული საკითხების საერთაშორისო დღის წესრიგში მაღალ დონეზე შენარჩუნებისა და საქართველოს აფხაზეთისა და სამხრეთ ოსეთის რეგიონებში არსებული განვითარებების შესახებ ცნობადობის ამაღლების მიზნით“, – აღნიშნულია ეუთო-ს მეგობართა ჯგუფის განცხადებაში.