პოლიტიკა
საქართველო აუცილებლად გახდება ნატოს წევრი ქვეყანა და ვერავინ შეუშლის ხელს ქართველი ხალხის ამ არჩევანს! - ამერიკელი სენატორი
საქართველო, 15 აპრილი, საქინფორმი. ამერიკის შეერთებულ შტატებში სამუშაო ვიზიტად მყოფი საგარეო ურთიერთობათა კომიტეტის თავმჯდომარე სოფიო ქაცარავა სენატორ როჯერ ვიკერს შეხვდა. შეხვედრაზე საქართველო-აშშ-ს შორის მჭიდრო ორმხრივ ურთიერთობებზე, ნატოში ინტეგრაციის გზაზე საქართველოს მიერ განხორციელებულ რეფორმებზე, საქართველოს სუვერენიტეტსა და ოკუპირებულ ტერიტორიებზე არსებულ ვითარებაზე, ორი ქვეყნის საკანონმდებლო ორგანოს შორის ურთიერთობების კიდევ უფრო გაძლიერებაზე ისაუბრეს.
„ყოველთვის მოხარული ვარ ქართველ კოლეგებთან თანამშრომლობის შესაძლებლობით, საქართველო ამერიკის სანდო პარტნიორი და მეგობარია, ჩვენ გვაქვს ორმხრივი მჭიდრო თანამშრომლობა და მხარს ვუჭერთ თქვენს ქვეყანას ევროატლანტიკურ ალიანსში გაწევრიანების გზაზე. საქართველო უნდა გახდეს და აუცილებლად გახდება ნატოს წევრი და ვერავინ შეუშლის ხელს ქართველი ხალხის ამ არჩევანს.ვულოცავ საქართველოს ქვეყანაში კანონის უზენაესობის განმტკიცებას, ღია და თავისუფალი არჩევნების ჩატარებას და დამოუკიდებელი სასამართლოს ფორმირებას“, – განაცხადა როჯერ ვიკერმა.
სენატორმა ქართველ კოლეგას პარლამენტარიზმის 100 წლის იუბილე მიულოცა. ინფორმაციას საქართველოს პარლამენტის პრესსამსახური ავრცელებს.
