საქართველო, 29 მაისი, საქინფორმი. მთაწმინდის ოლქში შუალედური არჩევნების მეორე ტურში გასული კანდიდატები – შალვა შავგულიძე და ლადო კახაძე დებატებში მონაწილეობასთან დაკავშირებით საქართველოს პირველი არხის წინადადებას დათანხმდნენ.
შესაბამისად, საქართველოს პირველი არხის ეთერში დებატები დაგეგმილია 6 ივნისს, ხუთშაბათს, 22:00 საათზე საერთაშორისო მედიაში აპრობირებული ფორმატით. მონაწილე მხარეებს თანაბარი საშუალება ექნებათ, ამომრჩეველს გააცნონ საკუთარი ხედვა, უპასუხონ წამყვანისა და ერთმანეთის შეკითხვებს.
დებატების ფორმატთან დაკავშირებით სხვა დეტალები „თავისუფალი დემოკრატები - ევროპული საქართველოსა“ და „ქართული ოცნება - დემოკრატიული საქართველოს“ კანდიდატებთან დამატებით შეთანხმდება.
საქართველოს პირველმა არხმა პარლამენტის შუალედური არჩევნების მეორე ტურში გასულ კანდიდატებს დებატებში მონაწილეობა საზოგადოების მაღალი ინტერესის გათვალისწინებით შესთავაზა.