საქართველო, 12 ივნისი, საქინფორმი. საქართველოს პრეზიდენტმა სალომე ზურაბიშვილმა შრომის საერთაშორისო ორგანიზაციის გენერალურ დირექტორთან შეხვედრისას დააყენა საკითხი, რომ შრომის საერთაშორისო ორგანიზაციის საქართველოსთან რეგიონული თანამშრომლობა არ ხორციელდებოდეს ორგანიზაციის მოსკოვის რეგიონული ოფისიდან, გამომდინარე იქიდან, რომ საქართველოს ევროკავშირის ასოცირებული წევრის სტატუსი აქვს და არ არის დსთ-ს წევრი ქვეყანა.

საქართველოს პრეზიდენტის განცხადებით, არანაირი არგუმენტი არ არსებობს იმისა, რომ საქართველო შრომის საერთაშორისო ორგანიზაციის მოსკოვის ბიუროდან იფარებოდეს, რომელიც დსთ-ს წევრ ქვეყნებს ფარავს. ამის შესახებ ინფორმაციას საქართველოს პრეზიდენტის ადმინისტრაციის პრესსამსახური ავრცელებს.

პრეზიდენტის ინიციატივაა, რომ საქართველო ბუდაპეშტში არსებული ცენტრალური და აღმოსავლეთ ევროპის ბიუროდან დაიფაროს.

აღნიშნული განცხადება სალომე ზურაბიშვილმა ჟენევაში, გაერო-ს ოფისში, შრომის საერთაშორისო კონფერენციის დაწყებამდე შრომის საერთაშორისო ორგანიზაციის გენერალურ დირექტორთან გაი რაიდერთან შეხვედრისას გააკეთა.

საუბარი შეეხო ევროკავშირის კუთხით შრომით საკითხებთან დაკავშირებულ თემებს, შრომითი მიმართულებით ევროპული ფასეულობების დანერგვისა და განვითარების საკითხებს.

საქართველოს პრეზიდენტმა ოკუპირებულ ტერიტორიებზე არსებულ ვითარებაზე ილაპარაკა და აღნიშნა, რომ სამწუხაროა, როცა საქართველოს ოკუპირებულ ტერიტორიებზე მცხოვრები მოსახლეობა ვერ სარგებლობს იმ რეფორმების შედეგებითა და სიკეთეებით, რასაც საქართველო ახორციელებს. მხარეებმა შეხვედრის შემდეგ საჩუქრები გაცვალეს.

საქართველოს დელეგაციას ორგანიზაციის გენერალურმა დირექტორმა ოფიციალურ მიღებაზე უმასპინძლა, რომელიც უმაღლესი დონის დელეგაციებისთვის გაიმართა.