რელიგია
მეუფე შიო - ვევედროთ ღირს დავით გარეჯელს, რომ უდაბნოსა და ჩიჩხიტურის მონასტრებში შევძლოთ წირვა-ლოცვა

 საქართველო, 5 ივნისი, საქინფორმი. დავით გარეჯის სამონასტრო კომპლექსში გარეჯობა აღინიშნა. 4 ივნისი 13 ასურელი მამათაგან ერთ-ერთის, მამა დავით გარეჯელის ხსენების დღეა. დღესასწაული გარდამავალია და ის ამაღლების შემდეგ ხუთშაბათს აღინიშნება.

სამონასტრო კომპლექსში პატრიარქის მოსაყდრე, მიტროპოლიტი შიო იმყოფებოდა, რომელმაც მამა დავით გარეჯელის მიერ დაარსებულ ლავრაში პარაკლისი გადაიხადა და შეკრებილ მრევლს ქადაგებით მიმართა.

დღეს ჩვენ ვფიქრობთ იმ პრობლემაზე, რომელიც ამ მონასტრის მიმდებარე ორ მონასტერს ეხება, ეს არის უდაბნო და ჩიჩხიტური. იცით, რომ ორივე მონასტერი თავად დავით გარეჯელის მიერ არის დაარსებული. ეს არის ისტორიულად ქართული სავანეები, მონასტრები და დღეს, სამწუხარო რეალობის გამო, ვერ ავდივართ იქ და ვერ ვატარებთ წირვა-ლოცვას. ჩვენ ვევედროთ ღირს დავით გარეჯელს და ვიქონიოთ სურვილი, რომ ეს ვითარება გამოსწორდება და ერთად შევძლებთ იქ წირვა-ლოცვას ისე, როგორც მამა დავითსა და ჩვენს წინაპრებს გაეხარდებათ“, – აღნიშნა მეუფე შიომ.

ჩვენ გვაქვს იმედი, რომ აზერბაიჯანთან ჩვენი ძმობაც შენარჩუნდება და ამასთან ერთად, სიმართლეც დადგინდება და კომისიის მუშაობა კეთილად წარიმართება, – ამის შესახებ საქართველოს საპატრიარქო ტახტის მოსაყდრემ, სენაკისა და ჩხოროწყუს ეპარქიის მიტროპოლიტმა, მეუფე შიომ დავით გარეჯში, წირვის დასრულების შემდეგ განაცხადა.

მისი თქმით, დავით გარეჯი არის უმნიშვნელოვანესი მონასტერი, რომელსაც საქართველოს ათონს უწოდებდნენ, ისეთი მნიშვნელობა ჰქონდა და აქვს.

მისი უწმინდესობის ღვაწლის ერთ-ერთი დიდი შედეგია ჩვენი სამონასტრო ცხოვრების გაცოცხლება საქართველოში და მათ შორის, დავით გარეჯში. ჩვენ ვულოცავთ მთელ საქართველოს ამ დღეს და, რა თქმა უნდა, ვფიქრობთ იმ ორ მონასტერზე, რომლებიც იმყოფება დავით გარეჯის მახლობლად. ეს არის უდაბნო და ჩიჩხიტური. ეს ორი სავანეა, რომლებიც ისტორიულად არის ქართული ძეგლები და ქართული სავანეები, ღირსი დავით გარეჯელის დროინდელია, მისი თანამედროვეა და მისი თანამედროვეების დაარსებულია. სამწუხაროდ, დღეს ჩვენ იქ ვერ ავდივართ, ვერ ვლოცულობთ და ვერ ვწირავთ“, – აღნიშნა მეუფე შიომ.

მისი თქმით, იმედოვნებს, რომ დავით გარეჯის საკითხზე სიმართლე დადგინდება.

დღეს ჩვენ ვევედრეთ ღირს მამა დავითს, რომ ეს ვითარება სულ მალე შეიცვალოს. თქვენ იცით, რომ მუშაობს ორმხრივი კომისია, ახალი კომისია. როგორც ვიცით და იმედი გვაქვს, ეს კომისია ბევრად უფრო პრინციპულია, ვიდრე წინა პერიოდში იყო, ამიტომ იმედი გვაქვს, რომ დადგინდება ეს სიმართლე და სულ ცოტა ხანში შევძლებთ იქ წირვა-ლოცვის ჩატარებას. ჩვენ გვაქვს იმედი, რომ ჩვენი ძმობაც შენარჩუნდება, რომელიც გვაქვს აზერბაიჯანთან და ამასთან ერთად, ეს სიმართლეც დადგინდება და კომისიის მუშაობა კეთილად წარიმართება“, – განაცხადა მეუფე შიომ.