საქართველო, 6 ივლისი, საქინფორმი. მკითხველს, რა თქმა უნდა, ახსოვს, რომ საქინფორმი დაწვრილებით აშუქებდა საინტერესო ისტორიას, როდესაც აშშ–სა და ევროკავშირის ელჩები საქართველოში, სხვა დასავლელ ელჩებთან ერთად, სტატისტების როლში (ე.წ. ფასილიტატორები - ფალსიფიკატორები) აიძულებდნენ „ქართული ოცნების“ ხელისუფლებას, დაეთმო სააკაშვილის ოპოზიციისთვის და შეეცვალა საარჩევნო კოდექსი. ბრიუსელიდან და ვაშინგტონიდან მიღებული დავალებების შესაბამისად - არავითარ შემთხვევაში არ დაუშვან ოქტომბერში პარლამენტში რუსულ ბექგრაუნდიანი ოლიგარქის ანუ ბიძინა ივანიშვილის მოსვლა, დიდწილად, როგორც ახლა, მათ თავიანთ მიზანს მიაღწიეს, მაგრამ ... მხოლოდ ახლა შენიშნეს, რომ ქართველმა ხალხმა ვერც კი შეამჩნია მათი ძალისხმევა კონსტიტუციაში შესატან ცვლილებებთან დაკავშირებით, ამიტომ ხალხის მონაწილეობის გარეშე მიღებული საარჩევნო კოდექსის 120 + 30 ლეგიტიმაცია საეჭვოა...

„ვწუხვარ, რომ ახალი საარჩევნო კანონმდებლობის უფრო ფართო პოლიტიკური მხარდაჭერის მიღების შესაძლებლობა ხელიდან იქნა გაშვებული“, – ამის შესახებ ახალი საარჩევნო კანონმდებლობის დამტკიცებასთან დაკავშირებით საქართველოში ევროკავშირის ელჩის, კარლ ჰარცელის განცხადებაშია აღნიშნული.

ელჩის თქმით, 2 ივლისს საქართველოს პარლამენტმა საარჩევნო კანონმდებლობის ცვლილებათა პაკეტი დაამტკიცა, რაც ერთ წელზე მეტი ხნის წინ დაწყებული პროცესის შედეგი იყო და რომელსაც ევროკავშირის წარმომადგენლობა აქტიურად უჭერს მხარს.

„მივესალმები ეუთო/ოდირის (OSCE/ODIHR) რეკომენდაციების გათვალისწინებით მიღებულ სასიკეთო ცვლილებებს კანონმდებლობაში, მათ შორის საბიუჯეტო სექტორში დასაქმებულთა მიერ საარჩევნო კამპანიაში მონაწილეობის უფლებების რეგულირებას, მეორე ტურებისთვის მკაფიოდ განსაზღვრულ რეგულაციებს, ქალთა წარმომადგენლობის მხარდაჭერას, საარჩევნო კომისიების წევრებთან მიმართებაში ინტერესთა კონფლიქტის გამორიცხვასთან დაკავშირებული წესების დახვეწასა და პარტიების დაფინანსების რეგრესული მოდელის დანერგვას.

სასურველი იქნებოდა უფრო ამბიციური რეფორმების განხორციელება ეუთო/ოდირის (OSCE/ODIHR) მიერ რეკომენდებულ საკვანძო სფეროებში, როგორებიცაა ამომრჩეველზე ზეწოლა, დავების განხილვა და საარჩევნო კომისიების დაკომპლექტება; ვწუხვარ, რომ ახალი საარჩევნო კანონმდებლობის უფრო ფართო პოლიტიკური მხარდაჭერის მიღების შესაძლებლობა ხელიდან იქნა გაშვებული.

მოახლოვებული საპარლამენტო არჩევნები გადამწყვეტი მომენტი იქნება საქართველოს მიერ აღებული ვალდებულების – დაიცვას დემოკრატიული პროცესები და კანონის უზენაესობა – შესრულების შესაფასებლად.

ველი, რომ პროცესი ახალი წესების დაცვით ჩატარდება და არჩევნებისთვის შემდგომი მზადება განხორციელდება; ევროკავშირი მზადაა, გააგრძელოს საქართველოსთვის დახმარების გაწევა მისი მიზნის მიღწევაში, რაც შემოდგომაზე არჩევნების უმაღლესი სტანდარტების შესაბამისად ჩატარებას გულისხმობს“, – აღნიშნულია ჰარცელის განცხადებაში.

საქართველოს პარლამენტმა „საარჩევნო კოდექსში“ მომზადებული ცვლილებები მესამე მოსმენით 2 ივლისს დაამტკიცა.