საქართველო, 5 მაისი, საქინფორმი. ინფლაციასთან დაკავშირებით, როგორც მოგეხსენებათ გავლენა მოახდინა იმ ორმა შოკმა, რომელიც გვქონდა. პირველი, ეს იყო პანდემია, რომელსაც შემდეგ უკვე მოჰყვა რუსეთის შეჭრა უკრაინაში. მიწოდების ფაქტორები იყო ის ძირითადი ფაქტორები, რომელმაც გამოიწვია ფასების გაზრდა, – ამის შესახებ ეროვნული ბანკის პრეზიდენტმა კობა გვენეტაძემ განაცხადა.

მისი თქმით, ეს არ არის მხოლოდ საქართველოს პრობლემა, რადგან ეს არის გლობალური პრობლემა.

„რაც შეეხება რეაგირებას ამასთან დაკავშირებით, მოგეხსენებათ, რომ მონეტარული პოლიტიკა არის მოთხოვნის მხარეზე ზემოქმედების ელემენტი და მიწოდების მხარეს ზემოქმედების ელემენტი როგორც ასეთი, არ არსებობს მონეტარულ პოლიტიკაში, რადგანაც ის ფაქტორი, რომელიც ზრდის ინფლაციას არის ეგზოგენური, ანუ საგარეო. როდესაც მაგალითად, ნავთობის ფასები იზრდება, როდესაც საკვები პროდუქციის ფასები იზრდება, ის ავტომატურად გადაეცემა ქვეყნის შიგნით ეკონომიკას. თუმცა, ამ შემთხვევაში მნიშვნელოვანი არის გავითვალისწინოთ ის ფაქტორები, რომ პანდემიის გამო ჩვენ გვქონდა ე.წ. დაგუბებული მოთხოვნა, რომელმაც იქონია გავლენა და აქედან გამომდინარე არის ის, რომ ზრდა პორტფელის ჯერჯერობით კვლავ მაღალია. თუმცა, ჩვენი გაცხადებული პოლიტიკის შედეგად, ჩვენ ყველა ზომას მივიღებთ, რომ ინფლაცია მოლოდინებში არ გადაიზარდოს. სწორედ ამისთვის არის საჭირო და მნიშვნელოვანი, რომ მონეტარული პოლიტიკა მკაცრ დონეზე შენარჩუნდეს. ჩვენ ამავე დროს განვაცხადეთ, რომ მონეტარული პოლიტიკა გამკაცრდება იქამდე, სანამ ჩვენ არ დავინახავთ იმის ნიშნებს, რომ ინფლაციის მოლოდინები არის მოთოკილი“, – განაცხადა გვენეტაძემ.