თბილისი, 9 სექტემბერი. საქინფორმი. როგორც რუსთაველის თეატრის ყოფილმა სამხატვრო ხელმძღვანელმა რობერტ სტურუამ „ობიექტივთან“ საუბრისას განაცხადა, შეთავაზების მიუხედავად, რუსთაველის თეატრში დაბრუნებას არ აპირებს, რადგან თვლის, რომ ეს კახპას საქციელი იქნება.

„ზრდილობიანი ადამიანი ვარ, მაგრამ როცა მაბრაზებენ, მეც ვხდები უზრდელი. ჩემს თავს ხომ უნდა ვცე პატივი? ჯერ გამაგდეს, მერე მეუბნებიან – ორი სპექტაკლი დადგი და დიდ ხელფასს მოგცემთო. ახლა აღარ ვარ ქსენოფობი? ჩემი დაბრუნება რუსთაველის თეატრში დაემსაგავსება კახპას საქციელს. გამომაგდეს, დამცინეს, შეურაცხყოფა მომაყენეს და ახლა მეუბნებიან – მოდიო“, – აცხადებს სტურუა.
ამასთან, რეჟისორი ამ დღეებში გავრცელებულ ინფორმაციასაც გამოეხმაურა იმასთან დაკავშირებით, თითქოს ის მოსკოვის თეატრი „Et Cetera“-ს შემოთავაზებას  ოფიციალურად დათანხმდა. როგორც სტურუამ განმარტა, მოსკოვში მხოლოდ ერთ სპექტაკლს დადგამს.

ინტერვიუში მან ქართველი მსახიობებისა და რეჟისორების შესახებაც ისაუბრა და აღნიშნა, რომ მათზე გული სწყდება.

„ამათ თეატრი არ უნდათ. ამათ მიუზიკლები და სიმღერები უნდათ. „ქეთო და კოტე“ ჩემთვის აბსოლუტურად მიუღებელია. ბოდიშს ვუხდი დოიაშვილს... მწყინს, რომ არც დოიაშვილი, არც ჭოლა და არც სხვა რეჟისორები, რომელთაც პატივს ვცემ, არ გამომესარჩლნენ“, – აღნიშნა სტურუამ.