სამართალი
„კონსტიტუციის 42-ე მუხლი“ ქსნის საპყრობილეში პატიმარზე განხორციელებულ ძალადობას ეხმიანება
თბილისი, 21 მაისი, საქინფორმი. როგორც საქინფორმს „კონსტიტუციის 42-ე მუხლი“აცნობებს, არასამთავრობო ორგანიზაცია ეხმიანება ორგანიზაცია “სოლიდარობა უკანონო პატიმრების” მიერ გაკეთებულ განცხადებას ქსნის საპყრობილეში პატიმარზე განხორციელებულ ძალადობასთან დაკავშირებით და აღნიშნავს, რომ წამება და არაადამიანური მოპყრობა აკრძალულია და მიუღებელია დემოკრატიული საზოგადოებისათვის.
„წამებისა თუ არაადამიანური მოპყრობის ფაქტის შესახებ ინფორმაციის მიღებისთანავე სახელმწიფო სტრუქტურის წარმომადგენლები ვალდებულნი არიან, მყისიერი რეაგირება მოახდინონ, აწარმოონ მიუკერძოებელი, ობიექტური და ეფექტიანი გამოძიება, გამოავლინონ და დასაჯონ დამნაშავე პირები“, – ნათქვამია განცხადებაში.
„კონსტიტუციის 42-ე მუხლი” მოუწოდებს სათანადო სახელმწიფო უწყებებს, რეაგირების გარეშე არ დატოვონ ქსნის №15 დაწესებულებაში მომხდარი ფაქტი და აწარმოონ ეფექტიანი გამოძიება.
