აქტუალური
უხვი ნალექი დასავლეთ საქართველოში
თბილისი, 12 ივლისი, საქინფორმი. უხვი ნალექის შედეგად ქუთაისში წერეთლის ქუჩაზე რამდენიმე სახლის პირველი სართული და სარდაფები წყლით გაივსო. სტიქიამ პრობლემები ავტოქარხნის დასახლებაში მცხოვრებთაც შეუქმნა. აღნიშნულ დასახლებაში მდინარე ოღასკურა ადიდდა. ადიდებულმა წყალმა ქუჩები დატბორა, შედეგად კი, მოსახლეობა ქუჩებში გადაადგილებას ვერ ახერხებდა. ქუთაისში მცხოვრებნი პრობლემას ქალაქში სანიაღვრე ქსელის გაუმართაობას უკავშირებენ.
„წლებია, პრობლემა გვაწუხებს, თუმცა მისი გადაწყვეტა დღემდე ვერ მოხერხდა. საკმარისია 20 წუთის წვიმა, რომ სახლები და ქუჩები დაიტბოროს“, – ამბობს მოსახლეობა.
წყლით დატბორილ წერეთლის ქუჩაზე სამაშველო სამსახურის წარმომადგენლები ამოტუმბვით სამუშაოებს ახორციელებენ. ქუთაისის მერიაში აცხადებენ, რომ ქალაქში სანიაღვრე სისტემის მოწესრიგება ეტაპობრივად მოხდება.
შეგახსენებთ, რომ უხვმა ნალექმა პრობლემა ქვეყნის მასშტაბით შექმნა.
