თბილისი, 16 ოქტომბერი, საქინფორმი. „ქართული ოცნების“ ფინანსური ჯგუფის ხელმძღვანელი და ექსპერტი დემურ გიორხელიძე განმარტავს, რომ პირველადი მოხმარების პროდუქციის ფასების  მატება მხოლოდ იმ კომპანიებს შეიძლება დაბრალდეს, რომლებსაც მონოპოლია აქვთ ქართულ ბაზარზე.

მისი თქმით, ფასების თამაში დამოკიდებულია ობიექტურ და სუბიექტურ  გარემოებებზე. საერთაშორისო დონეზე კონიუნქტურული ცვლილების შედეგად გამოწვეულ ობიექტურ ფაქტორებს წინ ვერ აღვუდგებით, მაგრამ ამ კონკრეტულ შემთხვევაში, როგორც საწვავთან, ისე პურთან დაკავშირებით, ობიექტური ფაქორები არ არსებობს. „ეს არის წმინდა შიდა ქართული სუბიექტური ფაქტორები. ცალკეულ სფეროში მონოპოლიები არსებობს.  ქვეყანა დამოკიდებულია სტრუქტურირებულ იმპორტზე, რაც ნიშნავს, რომ თითოეულ იმპორტს ჰყავს თავისი პატრონი, რომელიც დაკავშირებული იყო ძალიან გავლენიან სახელისუფლებო ჯგუფებთან“, – განმარტავს დემურ გიორხელიძე.

მისი თქმით, იმპორტის კონტროლის  ასეთმა სტრუქტურამ გამოიწვია  ქვეყნის შიდა წარმოების განვითარების შეზღუდვა. ასეთი დამოკიდებულება კი მონოპოლისტს უჩენს მონოპოლიური ფასწარმოქმნის უფლებას. „როცა შემომტანი ერთია, მაკონტროლებელი ერთია, ბუნებრივია, მისი ფასი დაცულია, – ამბობს გიორხელიძე და იქვე დასძენს, – დღევანდელ ქართულ  ბაზარზე, წლის მოგების სახით, ხაზს ვუსვამ, საქართველოს მოქალაქეების ჯიბეებიდან დაახლოებით მილიარდ 700 ათასიდან 2 მილიარდამდე დოლარი ამოდის“...