პოლიტიკა
ევროპარლამენტის პრეზიდენტი: „ჩემს ქვეყანაში ყოფილ მინისტრებს არ აპატიმრებენ“
საქართველო, 15 ნოემბერი. საქინფორმი. „ჩემს ქვეყანაში – გერმანიაში, ყოფილ მინისტრებს არ აპატიმრებენ“, – განაცხადა გუშინ ბრიუსელში ევროპარლამენტის პრეზიდენტმა მარტინ შულცმა საქართველოს პრეზიდენტ მიხეილ სააკაშვილთან ერთობლივ პრესკონფერენციაზე. თუმცა, ევროპარლამენტის პრეზიდენტისავე განმარტებით, საკუთარ პოზიციას ამ საკითხთან დაკავშრებით იგი მას შემდეგ დააფიქსირებს, რაც მისი თანაშემწეები სიტუაციას შეისწავლიან და ანგარიშს წარუდგენენ.
შულცის განმარტებით, მისი კოლეგების მიერ ამ ფაქტებზე გაკეთებული განცხადებების მიუხედავად, იგი შეფასებების გაკეთებას არ ჩქარობს. „მესმის მათი რეაქცია, მაგრამ პირველ რიგში მსურს, უფრო კონკრეტულად ვიყო ინფორმირებული. გამაკვირვა იმ ფაქტმა, რომ მთავრობის ყოფილი წევრები მართლმსაჯულების ხელში არიან, მაგრამ მინდა, ვიცოდე უფრო მეტი ამ საკითხზე“, – განაცხადა შულცმა.
ევროპარლამენტის პრეზიდენტმა, ასევე, აღნიშნა, რომ საქართველოში არსებული ვითარება ძალიან მნიშვნელოვანია ევროკავშირისთვის, რადგან საქართველო „საიმედო პარტნიორია“ და თანამშრომლობის გაგრძელებისთვის მზაობა გამოთქვა.
