საქართველო, 20 ნოემბერი, საქინფორმი. ტელეკომპანია „მე-9 არხი“ შსს-ის მაღალჩინოსნის, დაკავებული ვასილ ჯამალაშვილის ისტორიით დაინტერესდა. „მეცხრე არხის“ ჟურნალისტი დაუკავშირდა ჩეხეთის სათვისტომოს წარმომადგენელ გიორგი ალანიას, რომლის თქმითაც, ჯამალაშვილს მასთან ვირტუალური ურთიერთობა ჰქონდა. მისი მონათხრობით ირკვევა, რომ ჯამალაშვილმა შემთხვევით „კუდ“-ის საიტი გატეხა, რის შემდეგაც იგი, სავარაუდოდ, უწყებაში მოხვდა. ასევე, არსებობს კიდევ ერთი ვერსია, რომლის მიხედვითაც, ორი წლის წინ მოზარდს სამსახურებრივი რეკომენდაცია მისმა მაშინდელმა ხელმძღვანელმა გაუწია. უკანონო მოსმენებში ეჭვმიტანილ მაღალჩინოსანს – მეოთხე სამმართველოს უფროსის მოადგილეს, დედა და 90 წლის ბებია ჰყავს. ოჯახი საქალაქო სასამართლოს გადაწყვეტილებას სააპელაციო სასამართლოში ასაჩივრებს და დაკავებული მოზარდის გათავისუფლებას ითხოვს.

ჩეხეთის სათვისტომის წარმომადგენლის განცხადებით, ჯამალაშვილი კუდ-ში მას შემდეგ მოხვდა, რაც ალანიამ მისთვის გაგზავნილი კომპიუტერის ვირუსის წარმომავლობის დადგენა სთხოვა. ჯამალაშვილმა დაადგინა, რომ ვირუსი გაგზავნილი იყო კუდ-იდან, შესაბამისად, გატეხა და გათიშა საიტი. სწორედ ამის შემდეგ დაინტერესდა კუდ-ი ჯამალაშვილით და თანამშრომლობა მოსთხოვა, წინააღმდეგ შემთხვევაში კი დაჭერით დაემუქრა. ალანიას თქმით, ჯამალაშილს სხვა გამოსავალი არ ჰქონდა.

ჯამალაშვილის კუდ-ში მოხვედრის განსხვავებულ ვერსიაზე ლაპარაკობს მისი ადვოკატი გიორგი ფოფხაძე. მისი განცხადებით, თავდაპირველად ჯამალაშვილმა მუშაობა დაიწყო კომპიუტერული მომსახურების კომპანია „კომპსერვისში“, რის შემდგაც გადავიდა კომპანია „პრედატორში“, რომელიც კომპიუტერული თამაშების შექმნაზე მუშაობს და ამ კომპანიაში მისმა უშუალო უფროსმა გაუწია კუდ-ში რეკომენდაცია. მას შეხვდა ლელუაშვილი, ახალაიას მოადგილე, შესთავაზა მუშაობა და 16 წლის მოზარდი კუდ-ში სამუშაოდ წაიყვანეს. 17 წლისა დაინიშნა ერთ-ერთი სამმართველოს უფროსის მოადგილედ. როგორც საქმის მასალებიდან ირკვევა, იგი იყო ერთ-ერთი შემქმნელი პროგრამებისა, რომლებიც შემდგომ ცნობილ გახმაურებულ მოსმენებში იქნა გამოყენებული.

„კომპსერვისის“ დამფუძნებლის განცხადებით, ჯამალაშვილმა ახალი პროგრამების შექმნა კი არა, კუდ-ში უკვე შექმნილი პროგრამების კონფიგურაცია მოახდინა.