საქართველო, 11 დეკემბერი, საქინფორმი. გუშინ საქართველოს პარლამენტში ფოტოგრაფების – ირაკლი გედენიძის, გიორგი აბდალაძისა და ზურაბ ქურციკიძის – ფოტოგამოფენა გაიხსნა. ფოტოგამოფენა სახელწოდებით „NO PUCTURES – NO DEMOCRACY!“ ადამიანის უფლებათა დაცვის საერთაშორისო დღეს მიეძღვნა. საქინფორმის მკითხველს შევახსენებთ, რომ ეს ფოტოგრაფები ფოტორეპორტიორთა საქმის „მთავარი გმირები“ არიან, რომელთაც თავადაც განიცადეს წინა ხელისუფლების მხრიდან რეპრესიები.
გამოფენა ავტორებმა პარლამენტის თავმჯდომარე დავით უსუფაშვილთან ერთად გახსნეს.
როგორც გამოფენაზე სიტყვით გამოსვლისას უსუფაშვილმა განაცხადა, ქვეყანაში ადამიანის უფლებების დაცვა ჯერ კიდევ პრობლემად რჩება და ეს გამოფენაც სწორედ ადამიანის უფლებების დაცვას მიეძღვნა. პარლამენტის თავმჯდომარის თქმით, გამოფენა იმის დემონსტრირებაა, რომ ქართული სახელმწიფო ჯერ კიდევ ვერ შედგა, რადგან ქვეყანას, სადაც ასეთი ამბები ხდება, არ შეიძლება ცივილიზებული და თანამედროვე სახელმწიფო ეწოდოს. „7 ნოემბერმა, სამწუხაროდ, სახელმწიფო თანამდებობის პირებს, ვისაც მაშინ ებარა ეს ქვეყანა, ვერ ასწავლა ჭკუა და 26 მაისი გაიმეორეს ახალი სისასტიკით“, – განაცხადა მან.

„ახალი ხელისუფლების ღირებულებითი და პოლიტიკური პრიორიტეტები არის ადამიანი და ადამიანის უფლებები და მსგავსი რამ ქვეყანაში აღარ უნდა დავუშვათ“, – განაცხადა დავით უსუფაშვილმა და დასძინა, რომ ასეთი გამოფენა უნდა მოეწყოს არა მხოლოდ საქართველოს პარლამენტში, არამედ ყველგან, ქვეყნის გარეთაც, რათა ყველამ დაინახოს ყოფილი ხელისუფლების ნამდვილი სახე.