საქართველო, 18 დეკემბერი, საქინფორმი. რფ-ის უშიშროების საბჭოს მდივანმა ნიკოლაი პატრუშევმა გაზეთ „კომსომოლსკაია პრავდასთან“ ინტერვიუში განაცხადა: „ჩვენ მზად ვართ დიალოგისა და თანამშრომლობისათვის, მაგრამ ორიენტირებული უნდა ვიყოთ არა მარტო განცხადებებზე, არამედ საქართველოს ხელისუფლების რეალურ ნაბიჯებზეც, რომლებიც პირველმა უნდა გადმოდგან. სამწუხაროდ, ისინი ჯერჯერობით არ ლაპარაკობენ იმაზე, რომ რუსეთის მიერ აღიარებული დამოუკიდებელი სახელმწიფოების – აფხაზეთისა და სამხრეთ ოსეთის მიმართ ძალას არ გამოიყენებენ“.

მისი თვალსაზრისით, ამჟამად თავად საქართველოში რთული პოლიტიკური ვითარებაა. ამასთან, ქვეყანაზე დიდ გავლენას ახდენენ აშშ და ნატო. „თვალშისაცემია წინააღმდეგობანი პრემიერ ბიძინა ივანიშვილსა და პრეზიდენტ მიხეილ სააკაშვილს შორის. მათ უნდა გადაჭრან შიდა პრობლემები და ჩამოყალიბდნენ, ვის რა როლი აკისრია. ერთი მათგანი ამბობს, რომ რფ-თან ურთიერთობების დარეგულირებითაა დაინტერესებული, მეორე ასეთ განცხადებებს არ აკეთებს. ზოგიერთ სხვა საკითხში მათი პოზიციები თანხვედრია, მაგალითად, ორივე აცხადებს, რომ მათი მიზანი ნატოსა და ევროკავშირში საქართველოს გაწევრებაა, – აღნიშნა პატრუშევმა და დასძინა, – ჩვენი ხალხები ისტორიულად ახლობლები არიან, დიდი ხნის განმავლობაში ერთიან სახელმწიფოში ცხოვრობდნენ და აქტიურად თანამშრომლობდნენ“.