აქტუალური
ალექსი პეტრიაშვილმა მედიას ორთვიანი მუშაობის შედეგები წარუდგინა
საქართველო, 27 დეკემბერი, საქინფორმი. ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა მედიას სახელმწიფო მინისტრის რანგში მუშაობის ორთვიანი შედეგები წარუდგინა და სამომავლო გეგმები გააცნო. მისი განცხადებით, 2013 წლის ნოემბერში დაგეგმილ ვილნიუსის სამიტამდე საქართველო ევროკავშირთან ასოცირებისა და თავისუფალი ვაჭრობის ხელშეკრულებაზე მოლაპარაკებებს დაასრულებს. „2013 წლის ნოემბრის ვილნიუსის სამიტი საქართველოსთვის მიზნების ასრულებისა და მიღწევის სამიტი უნდა გახდეს“, – აღნიშნა მან.
სახელმწიფო მინისტრის განცხადებით, ასოცირებისა და თავისუფალი ვაჭრობის საკითხების მიმართულებით დოკუმენტთა 80%-ზე მეტი მხარეთა მიერ უკვე ხელმოწერილია, ამასთან, ევროკავშირი საქართველოს 60 მლნ ევროს გამოუყოფს, საიდანაც 20 მილიონი ყოვლისმომცველი ინსტიტუციური მშენებლობის პროექტებისთვის დაიხარჯება, ხოლო 40 მილიონს სოფლის მეურნეობის სამინისტრო გამოიყენებს.
როგორც პეტრიაშვილმა აღნიშნა, 2013 წლის 12-13 თებერვალს თბილისში აღმოსავლეთპარტნიორობის არაფორმალურ მინისტერიალზე სატრანსპორტო კომუნიკაციების საკითხებს განიხილავენ. მან პრესკონფერენციაზე ნატოსთან ურთიერთობის სამომავლო გეგმებზეც გაამახვილა ყურადღება და განაცხადა, რომ მომავალ წელს საქართველო ნატოს 2014 წლის სამიტისთვის მოემზადება; დაგეგმილია საქართველოში ნატოს სამხედრო კომიტეტის ვიზიტი. გარდა ამისა, გაიმართება ქართული მხარის შეხვედრები ალიანსის უმაღლესი რანგის თანამდებობის პირებთან. ალექსი პეტრიაშვილმა ნატოსა და ევროკავშირის წარმომადგენლებთან უწყების მიერ ორი თვის პერიოდში გამართული შეხვედრები დადებითად შეაფასა.
