პოლიტიკა
სამხრეთ ოსეთი საქართველოსთან ნებისმიერ კონტაქტს გამორიცხავს მისი დამოუკიდებლობის აღიარების გარეშე
საქართველო, 28 დეკემბერი, საქინფორმი. „სამხრეთ ოსეთი არავითარ კონტაქტზე არ წავა საქართველოს ახალ ხელისუფლებათან, სანამ საქართველო რესპუბლიკის დამოუკიდებლობასა და ოსი ხალხის გენოციდს არ აღიარებს“, – ამის შესახებ გუშინ, 27 დეკემბერს, ცხინვალში მედიასა და საზოგადოების წარმომადგენლებთან შეხვედრისას სამხრეთ ოსეთის ლიდერმა ლეონიდ თიბილოვმა განაცხადა.
„უპირველესად, საქართველომ ხელი უნდა მოაწეროს იურიდიულ დოკუმენტს სამხრეთ ოსეთისა დ ააფხაზეთის წინააღმდეგ ძალის გამოუყენებლობის შესახებ, რომელზეც უკვე არაერთი წელია, ჟენევის დისკუსიის ფაგრგლებში მუშაობა მიმდინარეობს. თუმცა, საქართველოს ძველი და ახალი ხელისუფლებაც მუდამ თავს არიდებენ ამ საკითხს“, – აღნიშნა თიბილოვმა, სააგენტო „რესის“ ინფორმაციით.
ამასთან, მან განაცხადა, რომ საქართველომ უნდა აანაზღაუროს მატერიალური ზარალი, რომელიც რესპუბლიკას 20-წლიანი აგრესიის მანძილზე მიაყენა.
„თავის დროზე შერეული საკონტროლო კომისიის ფარგლებში ჩვენ მოყენებული ზარალი დავთვალეთ და 1992 წლის ფასებში მან 32 მლრდ დოლარი შეადგინა“, – განმარტა თიბილოვმა და იქვე დასძინა, რომ სანამ ყველა ეს პირობა არ შესრულდება, საქართველოსთან არავითარ ურთიერთქმედებას ადგილი არ ექნება.
