სამართალი
აფხაზეთის რუსულენოვანი მოსახლეობა წართმეულ ბინებს ვერ იბრუნებს
საქართველო, 28 დეკემბერი, საქინფორმი. რუსეთის მოქალაქეები, რომლებმაც აფხაზეთი ომის დროს დატოვეს ანდა რესპუბლიკაში დარჩნენ, მაგრამ თაღლითთა მსხვერპლი შეიქნენ, უკანონოდ წართმეულ ბინებს ვერ იბრუნებენ. ამის შესახებ გაზეთი „მოსკოვსკი კომსომოლეცი“ წერს, რომელმაც 3 წლის წინ (2010 წლის თებერვალში) აღნიშნულ პრობლემაზე სტატია გამოქვეყნა. პუბლიკაციამ ხმაურიანი რეზონანსი გამოიწვია, რის შედეგადაც რუსულ-აფხაზური კომისია შეიქმნა, რომელიც აქტიურად შეუდგა მუშაობას. რფ-ის საგარეო საქმეთა წარმომადგენლები იუწყებოდნენ, რომ მჭიდროდ თანამშრომლობდნენ აფხაზეთის ხელმძღვანელობასთან, განცხადებებს განიხილავდნენ და გადაწყვეტილებებს იღებდნენ.
და მართლაც, კომისიამ ორ განცხადებაზე დადებითი გადაწყვეტილება მიიღო, ხოლო 300-მდე საჩივრიდან დასაბუთებულად ჩათვალა ექვსი. თუმცა, ვერცერთი დაზარალებული საკუთარ ბინაში ჯერჯერობით ვერ შესახლებულა.
გაზეთის პირველი პუბლიკაციიდან აფხაზეთში პრეზიდენტი შეიცვალა. ანქვაბმა არჩევნებში გაიმარჯვა არააფხაზი მოსახლეობის მხარდაჭერის წყალობით. მის წინასაარჩევნო დაპირებებში აღნიშნული საკითხის მოგვარების დაპირებაც შედიოდა. ანქვაბის მოსკოველი „ადვოკატები“ კრემლს არწმუნებდნენ, რომ მისი მეტოქეები აფხაზი ნაციონალისტები არიან, რომლებთანაც რუსეთს შეთანხმება გაუჭირდება.
„არადა,პოლიტიკაში გაცნობიერებულმა ყველა ადამიანმა იცის, რომ წინასაარჩევნო დაპირებები იმისთვის არ იწერება, რომ შესრულდეს. თუმცა, ჩვენ, რატომღაც, ვიმედოვნებდით, რომ ფახაზეთი გამონაკლისი იქნებოდა. აღმოჩნდა, რომ ვცდებოდით“, – წერს „მოსკოვსკი კომსომოლეცი“ გუშინ, 27 დეკემბერს, გამოქვეყნებულ სტატიაში – „რესპუბლიკის რუსულენოვანი მცხოვრებნი წართმეულ ბინებს უწინდებურად ვერ იბრუნებენ“.
