სამართალი
ურთიერთშელაპარაკებას სროლა მოჰყვა
საქართველო, 3 იანვარი, საქინფორმი. ახმეტის მაჟორიტარი დეპუტატის – ზურაბ ზვიადაურის (კოალიცია „ქართული ოცნება“),სახლს ცეცხლსასროლი იარაღით რამდენჯერმე ესროლეს. ეჭვმიტანილი უკვე დაკავებულია.
შსს-ის ინფორმაციით, დაკავებულს ამავე ქალაქში მცხოვრებ, პარლამენტის დეპუტატ ზურაბ ზვიადაურის ძმასთან – ზვიად ზვიადაურთან, ურთიერთშელაპარაკება მოუვიდა. მან დაშინების მიზნით ავტომატური ცეცხლსასროლი იარაღის გამოყენებით, რამდენჯერმე გაისროლა ზვიადაურის საცხოვრებელი სახლის მიმართულებით, რის შედეგადაც სახლი დაზიანდა.
ჩატარებული ოპერატიული ღონისძიებების შედეგად, ამოღებულია ავტომატური ცეცხლსასროლი იარაღი საბრძოლო ვაზნებით.
გამოძიება სისხლის სამართლის კოდექსის 239-ე მუხლის მესამე ნაწილით (ხულიგნობა), 236-ე მუხლის პირველი და მეორე ნაწილებით (ცეცხლსასროლი იარაღის, საბრძოლო მასალის მართლსაწინააღმდეგო შეძენა, შენახვა, ტარება) დაიწყო. ჩადენილი დანაშაული 4-დან 7 წლამდე პატიმრობას ითვალისწინებს.
