სამართალი
190 პოლიტპატიმარი განთავისუფლდა
საქართველო, 14 იანვარი, საქინფორმი. ამნისტიის პირველი ეტაპი გუშინ განხორციელდა. დილის 10 საათიდან, ოფიციალური ცნობით, 190 პოლიტპატიმარი გათავისუფლდა საქართველოს სასჯელაღსრულების 13 დაწესებულებიდან.
უჩა ნანუაშვილის თქმით, „დღევანდელი დღე არის ისტორიული. პოლიტიკური ნიშნით ადამიანების დევნა დამთავრდა. ეს პროცესი გრძელდება. ამ ადამიანებს სჭირდებათ ფსიქო-სოციალური რეაბილიტაცია“.
25 პოლიტიკური დევნილი დღეიდან მიიღებს გათავისუფლების თაობაზე სასამართლოს განჩინებას. ყველაზე მასშტაბურად ციხეებს 3000 პატიმარი ამნისტიის მეორე ეტაპზე ორი თვის შემდეგ დატოვებს. 17 ათასზე მეტი ადამიანის მიმართ კი შემსუბუქდება სასჯელი და გამოტანილი იქნება გადაწყვეტილება ამნისტიის გავრცელების შესახებ.
გათავისუფლებული პოლიტპატიმრები გუშინ სამების ტაძრის ეზოში შეიკრიბნენ. ისინი დღეიდან სამართლებრივ ბრძოლას გააგრძელებენ იმ მაღალჩინოსანთა მიმართ, რომლებმაც შეთითხნილი ბრალდებებით უსამართლოდ გაატარებინებეს მათ ციხეებში ამდენი დრო წამებისა და დამცირების ფონზე.პრეზიდენტი სააკაშვილი ახლად დანიშნულ გუბერნატორთან ერთად გუშინ შიდა ქართლში სტუმრობისას გათავისუფლებულ „რუსეთის აგენტებზე“ საუბრობდა. მისი განცხადებით, „ პარლამენტი, რადგან მაინცდამაინც აპირებდა მათ განთავისუფლებას, უნდა დაფიქრებულიყო გაცვლაზე მაინც იმ ადამიანებში, რომლებიც ანალოგიური ბრალდებით იმყოფებიან რუსეთის ციხეებში“. თუმცა, ეკა ბესელიას განმარტებით, „გაცვლა“ არ არის სამართლებრივი ტერმინი. მისივე თქმით, მმართველი გუნდი სრულად კისრულობს პასუხიმგებლობას უსაფრთხოების თვალსაზრისით. იგი ამბობს, რომ ამნისტიის აქტის გამოცემისას იხელმძღვანელეს ევროსაბჭოს საპარლამენტო ასამბლეის 2012 წლის ოქტომბრის რეზოლუციით, რომლითაც დადგინდა პოლიტპატიმრობის კრიტერიუმები.ამასთან, „როდესაც საქმეების გასაჯაროება მოხდება და საქმეებს მოსცილდება გრიფი საიდუმლო, რაც აუცილებლად მოხდება, საზოგადოება ნათლად დაინახავს, რასთან გვქონდა საქმე. ვნახავთ, ვის ეძახდა სააკაშვილი ჯაშუშებს, ვნახავთ, რომ იქ მტკიცებულებები საერთოდ არ იყო, ადამიანებს უმძიმეს დანაშაულებს აბრალებდნენ ისე, რომ არ უმტკიცებდნენ.“
