აქტუალური
ზარალის დამთვლელი ახალი კომისია მუშაობას იწყებს
საქართველო, 29 იანვარი, საქინფორმი. სტიქიით დაზარალებული კახეთის მოსახლეობის აქციები გრძელდება. ადგილობრივები სტიქიით მიყენებული ზარალის საკომპენსაციო თანხის გადანაწილების პროცესს აპროტესტებენ. მათი განმარტებით, ზარალი სრულად არ აღწერეს და ამიტომ თანხები არასამართლიანად ნაწილდება. როგორც ისინი ამბობენ, სიებში მხოლოდ სეტყვის შედეგად დაზარალებულები მოხვდნენ. მოსახლეობის მტკიცებით, ზარალი ხელახლა შექმნილმა კომისიამ თავიდან უნდა დათვალოს, წინააღმდეგ შემთხვევაში საპროტესტო აქციები გაგრძელდება.
როგორც მოსახლეობა აღნიშნავს, 2012 წლის 19 ივლისს სტიქიის ეპიცენტრად მიჩნეულია სოფელი ვაჩნაძეანი, რომლის მცხოვრებთაც დღემდე არ მიუღია კომპენსაციები.
დაზარალებულთა მოთხოვნებს ინფრასტრუქტურისა და რეგიონული განვითარების სამინისტროს წარმომადგენლები გამოეხმაურნენ. ისინი სოფელში ჩავიდნენ და ადგილობრივებს შეხვდნენ. უწყების თანამშრომლებმა აქციის მონაწილეებს განუმარტეს, რომ ზარალის ხელახალი დათვლა მიმდინარე კვირას დაიწყება და ყველა დაზარალებული შესაბამის ფულად ანაზღაურებას მიიღებს.
უწყების წარმომადგენელმა კოტე ხმალაძემ აფენის მოსახლეობასთან შეხვედრისას აღნიშნა, რომ თუ დადასტურდა ინფორმაცია კომისიის ძველი შემადგენლობის არაკანონიერად მუშაობის შესახებ, მათი პასუხისმგებლობის საკითხი დადგება.
