საქართველო, 30 იანვარი, საქინფორმი. როგორც  „თავისუფალი საქართველოს“ პრესსამსახური საქინფორმს ატყობინებს, პარტია შეშფოთებულია თბილისის მერიის სამსახურების მწყობრიდან გამოსვლის გამო. განცხადების თანახმად, განსაკუთრებით არჩევნების შემდგომ შეფერხებით მუშაობს დასუფთავების, ტრანსპორტის, კეთილმოწყობის, საგანგებო სიტუაციებისა და პრაქტიკულად ყველა სხვა სამსახური, რომელთა ფუნქციონირებაზეც ხშირად მოქალაქეთა სიცოცხლე და ჯანმრთელობაა დამოკიდებული. ეს მდგომარეობა, ბუნებრივია, იწვევს თბილისელების უკმაყოფილებას.

განცხადებაში საუბარია სასწრაფო დახმარების სამსახურის არასათანადოდ მუშაობის თაობაზეც: „ბრიგადების სიმცირის და სატრანსპორტო საშუალებების გაუმართაობის გამო სასწრაფო დახმარების თანამშრომლები გამოძახებებზე 1-1.5 საათის დაგვიანებით მიდიან. გამომდინარე იქიდან, რომ „112“-ის სერვისს ჰყავს 30 ოპერატორი და თითოეულ მათგანს უდგას 6 ტელეფონის აპარატი, შეფერხებით მუშაობს აღნიშნული სერვისი, სადაც ზოგჯერ საერთოდ არ პასუხობენ გაჭირვებაში მყოფ მოქალაქეებს. არადა, ამ სამსახურების გამართულად მუშაობისთვის ყოველთვიურად მილიონამდე ლარის ჩამოჭრა ხდება ჩვენი მოქალაქეების სატელეფონო ბალანსიდან“.

„თავისუფალი საქართველო“ მიიჩნევს, რომ აღნიშნული სიტუაცია ხელოვნურადაა შექმნილი ყოფილი ხელისუფლების წარმომადგენლებისა და პირადად თბილისის მერ გიგი უგულავას მიერ.

„ნაციონალური მოძრაობის“ მიზანს მოსახლეობაში უკმაყოფილების მუხტის ხელოვნურად გაზრდა წარმოადგენს და ამის გამო ყოფილი ხელისუფლება რისკის ქვეში აყენებს ჩვენი მოქალაქეების სიცოცხლესა და ჯანმრთელობას“, – ნათქვამია განცხადებაში.