საქართველო, 5 თებერვალი, საქინფორმი. კონფლიქტებისა და მოლაპარაკებების საერთაშორისო კვლევითი ცენტრის ორგანიზებით გუშინ საქართველოსა და რუსეთის ურთიერთობების პერსპექტივებთან დაკავშირებით სასტუმრო „ქორთიარდ მარიოტში“ შეხვედრა გაიმართა. 
შეხვედრაზე რუსი პოლიტოლოგების, რუსეთის საგარეო საქმეთა სამინისტროს საერთაშორისო ურთიერთობების მოსკოვის სახელმწიფო ინსტიტუტის მეცნიერ-თანამშრომლების – ნიკოლაი სილაევისა და ანდრეი სუშენცოვის მოხსენების – „საქართველო 2012 წლის არჩევნების შემდეგ და რუსულ-ქართული ურთიერთობების პერსპექტივები“ – პრეზენტაცია-განხილვა მოეწყო. ექსპერტმებმა სადისკუსიო საკითხებს შორის სამხრეთ ოსეთი და აფხაზეთი, საქართველოს ჩრდილოკავკასიური პოლიტიკა, ნატო და რეგიონული უსაფრთხოება, სავაჭრო ეკონომიკური თანამშრომლობა და ჰუმანიტარული სახის კონტაქტები დაასახელეს.

ანდრეი სუშენცოვის განცხადებით, რუს და ქართველ ექსპერტებს შორის ქართულ-რუსულ ურთიერთობებთან დაკავშირებით დისკუსიის მწვავედ წარმართვის მიუხედავად,  „იმედისმომცემია ის ტენდენცია, რომ მხარეები ერთმანეთის მოსასმენად მზად არიან“.

ქართველი ექსპერტები მიესალმებიან იმ ფაქტს, რომ ორი ქვეყნის ურთიერთობებში არსებული საკვანძო საკითხების განხილვაში ექსპერტთა წრეები ჩაერთნენ.

საქართველოს რეფორმების ასოციაციის თანადამფუძნებელ სერგი კაპანაძის შეფასებით, რუსი ექსპერტები კრემლის იდეებს წარმოადგენენ და საქართველოს სთავაზობენ, პოზიციების დათმობის ხარჯზე უკეთეს შემთხვევაში ვიზების გამარტივება მიიღოს. ეკონომისტ ლადო პაპავას შეფასებით კი, რუსი ექსპერტების ნაშრომში საკითხი სიღრმისეულად შესწავლილი არ არის და რეალობას ზედაპირულად ასახავს.