უცხოეთი
აშშ რუსეთს ბირთვული იარაღის შემცირებას სთავაზობს
საქართველო, 11 თებერვალი, საქინფორმი. აშშ რუსეთს ბირთვული იარაღის ორჯერ შემცირებასა და მხოლოდ ათასამდე ქობინის დატოვებას შესთავაზებს. ამის შესახებ გამოცემა „კომერსანტი“ იტყობინება.
„კომერსანტის“ ცნობით, აღნიშნული წინადადება მოსკოვში 12 თებერვალს აშშ-ის სახელმწიფო მდივნის მოადგილე როუზ გეტემიულერის ვიზიტისას გახმიანდება. ბირთვული შეიარაღების შემცირების იდეა ეფუძნება საიდუმლო მოხსენებას, რომელიც სახელმწიფო დეპარტამენტმა, პენტაგონმა, ნაციონალური უსაფრთხოების საბჭომ და აშშ-ის სტრატეგიულმა სარდლობამ მოამზადეს. დოკუმენტს უკვე გაეცნო ბარაკ ობამა. ის აშშ-ის სტრატეგიული ძალებისათვის მიზნების ნუსხას შეიცავს, საიდანაც ამოღებულია ერაყი და სირია, თუმცა, უწინდებურად რჩება ობიექტები რუსეთში, ჩინეთში, ირანსა და კორეის სახალხო-დემოკრატიულ რესპუბლიკაში. ასეთ ვითარებაში კი ვაშინგტონისთვის 1000-1100 ქობინი საკმარისია. 
