საქართველო, 14 თებერვალი, საქინფორმი. გუშინ, 13 თებერვალს, ტელეკომპანია „მაესტროს“ პირდაპირ ეთერში დეპუტატებს – კობა დავითაშვილსა და სერგო რატიანს შორის დაპირისპირება მოხდა. რატიანის თქმით, რომელიც პოლიციას 8 თებერვალს უმოქმედობაში ადანაშაულებდა, დავითაშვილის განცხადებები ადეკვატური იყო იმ დამატებების გარეშე, სადაც ის 7 ნოემბრისა და 26 მაისის მოვლენებზე პასუხს ითხოვდა. დავითაშვილი კი აცხადებდა, რომ წინა ხელისუფლებამ მისი მოკვლა სამჯერ ცადა და ამის გამო არავინ დასჯილა, რაზეც რატიანისგან პასუხად მიიღო,რომ „ეს უკვე წარსულია“ და ამას „ახლა მნიშვნელობა აღარ აქვს“.

„რა მნიშვნელობა აქვს, რომ მკლავდით? აი, სხვა დროს რომ შეიკრიბებით, მოვალ, დაგამტვრევთ ცხვირ-პირს ყველას და მერე წავალ და ჩავჯდები ციხეში. ბოლომდე გაგიჭეჭყავთ მაგ გველის თავს“, – განაცხადა დავითაშვილმა, რაზეც რატიანმა აღნიშნა, რომ მის ოპონენტს არ აქვს არცერთი არგუმენტი და მხოლოდ „გარდასულ დღეებზე ბღავის“. ამის შემდეგ უმრავლესობის წევრმა მას „ნაძირალა, არაკაცი და მკვლელი“ უწოდა. პასუხად რატიანმა სტუდიაში ჭიქა დაამტვრია. დავითაშვილის მოთხოვნა – გასულიყო სტუდიიდან, ერთმანეთის სიტყვიერ და ფიზიკურ შეურაცხყოფაში გადაიზარდა.

ინციდენტის შემდეგ დავითაშვილმა მაყურებელს ბოდიში მოუხადა, რატიანმა კი, რომელმაც სტუდია დატოვა, საგანგებო პრესკონფერენცია მოიწვია.