აქტუალური
დევნილების აქცია ქუთაისში
საქართველო, 19 მარტი, საქინფორმი. საქართველოს პარლამენტის წინ საპროტესტო აქცია გამართეს აჭარაში მცხოვრებმა სოხუმელმა დევნილებმა, რომლებიც ხელისუფლებას მის საარჩევნო დაპირებებს ახსენებენ და საცხოვრებელი ფართებით დაკმაყოფილებას ითხოვენ. მათი თქმით, ის 7000 ლარი, რომელიც წინა ხელისუფლებამ მათ კომპენსაციის სახით მისცა, ბინის შესაძენად საკმარისი არ აღმოჩნდა, რის გამოც დევნილები ღია ცის ქვეშ დარჩნენ და უკვე წელიწადზე მეტია, ქუჩებში აქციებს მართავენ.
„გვეუბნებოდნენ, სტრატეგიულ გეგმაში ხართ ჩასმული და ბათუმში, თამარის დასახლებაში, ობიექტი რომ აშენდება, იქ შეგასახლებთო. იქ აშენდა საცხოვრებელი, თუმცა, ის წყალტუბოდან, ზუგდიდიდან და ფოთიდან დევნილ ოჯახებს გაუნაწილეს“, – განაცხადეს აქციის მონაწილეებმა.
მათი თქმით, არჩევნებამდე ქვეყნის პრემიერისა და დევნილთა მინისტრ დავით დარახველიძისგან პრობლემის მოგვარების დაპირება მიიღეს. თუმცა, როგორც დევნილები ამბობენ, მინისტრმა შემდეგ განაცხადა, რომ სახელმწიფოს დევნილებისათვის, რომლებზეც ერთხელ უკვე გაიცა კომპენსაცია, ახალი კომპენსაციების გაცემის საშუალება არ აქვს.
