პოლიტიკა
მაია ფანჯიკიძის შეხვედრები ჰააგაში
საქართველო, 25 მარტი, საქინფორმი. საქართველოს საგარეო საქმეთა მინისტრი მაია ფანჯიკიძე ჰააგაში საქართველოს საელჩოში ევროპის ქვეყნებსა და საერთაშორისო ორგანიზაციებში საქართველოს დროებით რწმუნებულებს შეხვდა. შეხვედრას ევროპის 15 ქვეყანაში საქართველოს წარმომადგენლები ესწრებოდნენ. მინისტრმა ჩვენი ქვეყნის დიპლომატიურ მისიებს მუშაობის პრიორიტეტული მიმართულებები გააცნო. შეხვედრის ძირითადი საკითხი ევროკავშირთან ასოცირების შეთანხმების ტექსტზე დასრულებული მუშაობა, ვილნიუსის სამიტის მოსამზადებელი სამუშაოები და გაეროს რეზოლუცია იყო.
„ახლა ევროკავშირის ქვეყნებში არის ბევრი სამუშაო, რომ ვილნიუსის სამიტამდე მოხდეს ტექსტის პარაფირება. ყოველივე ამას ჭირდება ყოველდღიური, ძალიან ინტენსიური მუშაობა ევროკავშირის წევრ ქვეყნებში. ამიტომაც მოვიწვიეთ დღეს დროებითი რწმუნებულები ჰააგაში, რომ სწორედ ამ საკითხებზე ვიმსჯელოთ. მეორე მნიშვნელოვანი საკითხი, რომელზეც გვქონდა ლაპარაკი, არის გაეროში ჩვენი რეზოლუციის მხარდაჭერის მოპოვება მათ ადგილსამყოფელ ქვეყნებში“, – განაცხადა მინისტრმა.
ფანჯიკიძე ნიდერლანდებიდან ჟენევაში გაემგზავრება, სადაც მოლაპარაკებების 24-ე რაუნდში მიიღებს მონაწილეობას.
