საქართველო, 9 აპრილი, საქინფორმი. ახალციხეში ოსმალეთის ეპოქის ძეგლების აღდგენამ ზოგიერთი ქართველი პოლიტიკოსის განაწყენება გამოიწვია. ოპოზიციური პარტია “ქართული დასის“ თავმჯდომარე ჯონდი ბაღათურიამ თურქეთის ხელისუფლება ოსმალეთის იმპერიის აღდგენის და სამცხისა და აჭარის რეგიონების ხელმეორედ კოლონიზების მცდელობაში დაადანაშაულა, რომლებიც XVI-XIX საუკუნეებში თურქეთის სახელმწიფოს შემადგენლობაში შედიოდნენ. მან დაიმუქრა კიდეც, რომ თუ თურქეთის საგარეო საქმეთა მინისტრი აჰმედ დავითოღლუ არ შეწყვეტს პროვოკაციული განცხადებების გაკეთებას “სირიიდან აჭარამდე დიდი თურქეთის აღდგენის“ შესახებ, საქართველო-თურქეთის საზღვარზე, ბათუმისა და ახალციხის მახლობლად, ისევ შეიძლება გამოჩნდნენ რუსი მესაზღვრეები, რომლებიც იქიდან გასული საუკუნის ბოლოს გაიყვანეს.

გუშინ კი თბილისში არასამთავრობო ორგანიზაციებმა თურქეთის საელჩოს წინ საპროტესტო აქცია მოაწყვეს. აქციის მონაწილეებს მოჰქონდათ ტრანსპარანტები “ვგმობთ თურქეთის საგარეო საქმეთა მინისტრის განცხადებას!“, “ჩვენ ზედმეტი ტერიტორიები არ გვაქვს!“, “შეწყვიტეთ აჭარის ისლამიზაცია!“. მათ თურქეთის საგარეო საქმეთა მინისტრ აჰმედ დავითოღლუს განცხადებასთან დაკავშირებით ახსნა-განმარტება მოითხოვეს.

“ცხადია, რომ თურქეთს შორს მიმავალი გეგმები აქვს! ის ოსმალეთის იმპერიის აღდგენას იწყებს და სერიოზულად ფიქრობს ყოველგვარი ომისა და თავდასხმის გარეშე აჭარის მიერთებაზე. დავითოღლუს განცხადება შეურაცხმყოფელია და ორ სახელმწიფოს შორის განხეთქილება შეაქვს!“, - განაცხადეს აქციის მონაწილეებმა.

კოალიცია “ერთსულოვნების“ თავმჯდომარე მიხეილ ანდღულაძე არ გამორიცხავს, რომ დავითოღლუს განცხადება საქართველოს პრეზიდენტ მიხეილ სააკაშვილის მიერ იყო პროვოცირებული. აქციის მონაწილე არასამთავრობო ორგანიზაციებმა განაცხადეს, რომ ხელს მოაწერენ ერთობლივ განცხადებას და მას საქართველოში თურქეთის საელჩოს გადასცემენ.