საქართველო, 22 აპრილი, საქინფორმი. NDI-ს მიერ ჩატარებული გამოკითხვის მიხედვით, რომლის პრეზენტაცია დღეს სასტუმრო „ქორთიარდ მარიოტში“ გაიმართა, რესპონდენტთა მიერ მინისტრების მუშაობის შეფასებისას ყველაზე მეტი ქულა იუსტიციის მინისტრმა თეა წულუკიანმა მიიღო. მის საქმიანობას გამოკითხულთა 52% ძალიან კარგად ან კარგად აფასებს. მეორე პოზიციაზეა შს მინისტრი ირაკლი ღარიბაშვილი, რომლის საქმიანობას გამოკითხულთა 43% დადებითად აფასებს. მესამე ადგილი კი თავდაცვის მინისტრ ირაკლი ალასანიას უკავია, რომლის საქმიანობაც დადებითად რესპონდენტთა 42%-მა შეაფასა.

მეოთხე ადგილზე ხმათა 40%-ით საგარეო საქმეთა მინისტრი მაია ფანჯიკიძეა, რომელსაც ჯანდაცვის მინისტრი დავით სერგეენკო (36%) და ფინანსთა მინისტრი ნოდარ ხადური (35%) მოსდევენ. ენერგეტიკის მინისტრ კახა კალაძის საქმიანობას დადებითად გამოკითხულთა 32% აფასებს, ხოლო განათლების მინისტრ გიორგი მარგველაშვილის საქმიანობას - 29% დადებითად აფასებს.

სასჯელაღსრულების და პრობაციის მინისტრმა სოზარ სუბარმა გამოკითხულთა 33%-ის  დადებითი შეფასება დაიმსახურა, ხოლო სოფლის მეურნეობის მინისტრმა დავით კირვალიძემ - 27%-ის.

რეგიონული განვითარების მინისტრის დავით ნარმანიას საქმიანობას გამოკითხულთა 21% აფასებს დადებითად. მას მოსდევს რეინტეგრაციის მინისტრი პაატა ზაქარეიშვილი (20%) და ევროინტეგრაციის მინისტრი ალექსი პეტრიაშვილი (17%).