საქართველო, 7 მაისი, საქინფორმი. სოფლის მეურნეობის სამინისტროს და სახელმწიფო  შპს "მექანიზატორის" მაღალი თანამდებობის პირებმა, რომლებიც წინა კვირას კორუფციის ბრალდებით დააკავეს, გამოძიებას სკანდალური ჩვენება მისცეს, რომლის მიხედვითაც კორუფციულ სქემაში აქტიურად იყვნენ ჩართული  თბილისის პოლიციის ყოფილი შეფი სოსო ალავიძე და ამჟამინდელი შს მინისტრის მოადგილე დავით ბედია. აღსანიშნავია, რომ სოფლის მეურნეობის მინისტრის მოადგილე ვაჟა ნახუცრიშვილი (ალავიძის მძახალი) და შს მინისტრის მოადგილე დავით ბედია, ასევე, დაკავებული მაღალჩინოსანი ომარ ბედია (ალავიძის ბიძა და შსს-ს კრიმინალური პოლიციის უფროსის დავით ბედიას მამა) ალავიძის ნათესავები არიან.

გამოძიების ინფორმაციით, სოსო ალავიძე, დაკავებულ ვაჟა ნახუცრიშვილთან და ომარ ბედიასთან ერთად, ზეწოლას ახდენდა ექსპერტზე, რომ დასკვნა ჩეხური ტრაქტორების სასარგებლოდ დაეწერა. დაკავებულმა მაღალჩინოსნებმა და კორუფციული სქემის სათავეში მდგარმა პირებმა ე.წ. “ატკატებითა” და სხვა სახის დანაშაულებრივი კომბინაციით რამდენიმე მილიონი ლარი მიითვისეს.

გავრცელებული ინფორმაციით, მას შემდეგ, რაც სოფლის მეურნეობის სამინისტროს მაღალჩინოსნები დააკავეს, ალავიძე ქვეყნიდან გაიქცა და მისი ადგილსამყოფელი უცნობია.

რამდენიმე დღის წინ პრემიერ-მინისტრმა აღნიშნულ საქმესთან დაკავშირებით განაცხადა, რომ თანაგუნდელები და მინისტრები მას სოფლის მეურნეობის სამინისტროში არსებული კორუფციული სქემის გამოძიების შეწყვეტას სთხოვდნენ, რაზე მან უარი განაცხადა.