პოლიტიკა
სააკაშვილმა ბოტოქსის ინიექციებში 11 400 დოლარი გადაიხადა
საქართველო, 31 მაისი, საქინფორმი. ტელეკომპანია „იმედის“ ცნობით, რომელმაც პრეზიდენტ სააკაშვილის ხარჯთაღრიცხვის გასაიდუმლოებული დოკუმენტი მოიპოვა, მიხეილ სააკაშვილმა 2009 წლის 23 თებერვალს და 2011 წლის 23 სექტემბერს ნიუ-იორკის ერთ-ერთ კლინიკაში ბოტოქსის ინიექციების ორი სეანსი ჩაიტარა, რომლებიც ქართველ გადასახადის გადამხდელებს 5 600 და 5 800 დოლარი დაუჯდათ.
გარდა ამისა, დოკუმენტების მიხედვით, ცნობილმა მსახიობმა, რომელიც სურათებს საკუთარი სხეულით ხატავს, ერთი ნახატი საქართველოს პრეზიდენტისთვისაც შექმნა, რაშიც სააკაშვილმა 3 წლის წინ 5 993 გირვანქა სტერლინგი გადაიხადა.
არამიზნობრივად დახარჯულ თანხებს შორის ირიცხება პრეზიდენტის მიერ ამერიკელი ბიზნესმენი კრისტინა ვუსავას სასტუმრო "რედისონში" ცხოვრების ხარჯების ანაზღაურება, ასევე, მისთვის ბოტასების შეძენა, რაშიც, საერთო ჯამში, პრეზიდენტის ადმინისტრაციამ 6 668 ლარი გადაიხადა.
როგორც პროკურატურაში განმარტავენ, საქმე დიდია, მიმდინარეობს გამოძიება და გამოძიების ინტერესიდან გამომდინარე, საქმის სხვა დეტალებზე ჯერ არ ლაპარაკობენ. თუმცა აცხადებენ, რომ პროკურატურას გარკვეული კითხვები აქვს. "გამოძიებას აქვს უფლება, ყველა პირის მიმართ, ვისთანაც ეს გახდება საჭირო, დასვას შეკითხვები, მათ შორის პრეზიდენტთანაც. კანონი არ კრძალავს პრეზიდენტის დაკითხვას", - განაცხადა მთავარი პროკურატურის პრესმდივანმა ხათუნა პაიჭაძემ.
