საზოგადოება
ნანა კაკაბაძე: „რეჟიმი უნდა გასამართლდეს“
საქართველო, 4 ივნისი, საქინფორმი. პრემიერ-მინისტრის მიერ „პრაიმ-ტაიმისთვის“ მიცემულ ინტერვიუს, სადაც ბიძინა ივანიშვილმა განაცხადა, რომ სულაც არ მოეწონა ის, რაც სპორტის სასახლეში მოხდა და შთაბეჭდილება შეექმნა, რომ გარკვეულ ძალებს სახელმწიფოს ფუნქციის საკუთარ თავზე აღება სურთ, უფლებადამცველი ნანა კაკაბაძე გამოეხმაურა. სპორტის სასახლეში პოლიტპატიმრებისა და წინა ხელისუფლების რეჟიმის დროს დაზარალებულთა აქციის ერთ-ერთი ორგანიზატორი იმედოვნებს, რომ პრემიერ-მინისტრს „რაღაც ძალებში“ ისინი არ უგულისხმია.
„ჩვენ ხელისუფლების ხელში აღების ნიშნები არ გვქონია. ეს იყო შეხსენება და ვალდებულება იმის, რაზედაც ააგო წინასაარჩევნო კამპანია ახალმა ხელისუფლებამ. მოვითხოვთ დაზარალებულების უფლებების აღდგენას. ამ პრობლემებს იქ შეკრებილი ხალხისთვის სასიცოცხლო მნიშვნელობა აქვს. ისინი ვერ გაჩერდებიან, ან სიკვდილი, ან ეს პრობლემები. მათ მეტი გზა არ აქვთ“, – განაცხადა კაკაბაძემ, რომელიც ფიქრობს, რომ ხელისუფლება მაინც იზრუნებს ხსენებული პრობლემის მოგვარებაზე.
„წინა ხელისუფლება დამნაშავეა, რომ არ დააწესა ზღვარი ბანკებისა და კერძო იპოთეკარებისთვის, სამაგიეროდ ხდებოდა მათი კერძო ვოიაჟების და წინასაარჩევნო კამპანიების დაფინანსება, ამიტომ მოვითხოვთ, რომ რეჟიმი უნდა გასამართლდეს“, – განაცხადა უფლებადამცველმა.
