აქტუალური
შსს: ამოღებულია 97 აბი ნარკოტიკული საშუალება სუბოქსონი
საქართველო, 5 ივნისი, საქინფორმი. როგორ საქინფორმს საქართველოს შინაგან საქმეთა სამინისტროდან ატყობინებენ, ცენტრალური კრიმინალური პოლიციის დეპარტამენტის I მთავარი სამმართველოს თანამშრომლებმა ნარკოდანაშაულისთვის სამი პირი: 1967 წელს დაბადებული მირიან ლ., 1989 წელს დაბადებული შავლეგ ფ. და 1968 წელს დაბადებული მიხეილ გ. დააკავეს.
სამართალდამცველებმა ჩატარებული ოპერატიულ–საგამოძიებო ღონისძიებების შედეგად, სამტრედიის რაიონის სოფელ მიწაბოგირაში, საკუთარ საცხოვრებელ სახლში მიხეილ გ. და მასთან ერთად მყოფი მირიან ლ. დააკავეს. მირიან ლ-ს პირადი ჩხრეკისას – 14 აბი, მიხეილ გ-ს პირადი ჩხრეკისას - 3 აბი და 2 ნატეხი, ხოლო მისი სახლის ჩხრეკისას 30 აბი ნარკოტიკულისაშუალება ბუპრენორფინის შემცველი პრეპარატი სუბოქსონი ამოიღეს (უყურეთ ვიდეოს).
დანაშაულში ბრალდებული მესამე პირი სამართალდამცველებმა ცხელ კვალზე ჩატარებული ოპერატიულ-სამძებრო ღონისძიებების შედეგად ქუთაისში, ჭავჭავაძის გამზირზე დააკავეს. შავლეგ ფ-ს პირადი ჩხრეკისას 50 აბი ნარკოტიკულისაშუალება სუბოქსონი ამოიღეს.
გამოძიება მირიან ლ-ს მიმართ ნარკოტიკული საშუალების შეძენა-შენახვის ფაქტზე (სსსკ-ის 260-ე მუხლის მე-2 ნაწილის “ა”ქვეპუნქტით), ხოლო შავლეგ ფ-სა და მიხეილ გ-ს მიმართ დიდი ოდენობით ნარკოტიკული საშუალების შეძენა-შენახვის ფაქტზე (სსსკ-ის 260-ე მუხლის მე-3 ნაწილის “ა” ქვეპუნქტით) მიმდინარეობს.
