საქართველო, 10 ივნისი, საქინფორმი. შსს-ს შიდა ქართლის სამხარეო მთავარი სამმართველოს გორის რაიონული სამმართველოს თანამშრომლებმა, მიღებული ოპერატიული ინფორმაციის საფუძველზე ჩატარებული ოპერატიული და საგამოძიებო მოქმედებების შედეგად, გორის რაიონის სოფელ ატენში, ნუგზარ ა-ს საცხოვრებელი სახლის ჩხრეკისას ამოიღეს მართლსაწინააღმდეგოდ შენახული „გეკოს“ ტიპის მცირკალიბრიანი შაშხანა, „АКМ“ სისტემის ცეცხლსასროლი ავტომატური იარაღი, „საიგას“ ტიპის სანადირო თოფი 2 მჭიდითა და 10 საბრძოლო ვაზნით.

გამოძიება ცეცხლსასროლი იარაღის უკანონო შეძენა-შენახვის ფაქტზე სსსკ 236-ე მუხლის I ნაწილით მიმდინარეობს, რაც 3 წლამდე თავისუფლების აღკვეთას ითვალისწინებს.

შსს-ს ახალციხის რაიონული სამმართველოს და სამცხე–ჯავახეთის სამხარეო მთავარი სამმართველოს თანამშრომლებმა, ერთობლივად ჩატარებული ოპერატიულ-სამძებრო ღონისძიების შედეგად აღმაშენებლის ქუჩაზე  დააკავეს 1983 წელს დაბადებული ზურაბ გ. და 1988 წელს დაბადებული ალექსანდრე ს.. ალექსანდრე ს-ს პირადი ჩხრეკისას 0,0472 გრ. ნარკოტიკული საშუალება მორფინი  ამოიღეს. ექსპერტიზამ დაადგინა, რომ დაკავებისას ორივე ბრალდებული ნარკოტიკული ნივთიერების ზემოქმედების ქვეშ იმყოფებოდა. გამოძიებამ დაადგინა, რომ აღნიშნულმა პირებმა ნარკოტიკული საშუალება  1971 წელს დაბადებული თეიმურაზ ხ-სგან შეიძინეს, რომელიც სამართალდამცველებმა იმავე დღეს დააკავეს.