„შს მინისტრი მოვიდეს ხვალ ჩემს გადაცემაში. შეხვედრა დავტოვე იმიტომ, რომ იყო ცირკი და ცირკში მონაწილეობას არ ვაპირებ“, - განაცხადა ჟურნალისტმა ეკა კვესიტაძემ, რომლის თქმითაც, პროვოკაციები იყო შალვა რამიშვილისა და ირაკლი კაკაბაძისგან.
მედიისა და არასამთავრობო ორგანიზაციების წარმომადგენელთა ნაწილმა კადრების ნახვა საერთოდ არ მოისურვა. ჟურნალისტ დავით პაიჭაძის განცხადებით კი, მან ვერ მიიღო შს მინისტრისგან პასუხი, დაფარულია თუ არა ვიდეოკადრებში პიროვნების მაიდენტიფიცირებელი ყველა დეტალი, რის გამოც შეხვედრა დატოვა.
ვიდეომასალის ჩვენებამდე დატოვეს სამინისტრო არასამთავრობო ორგანიზაციების წარმომადგენლებმა - კახა კოჟორიძემ (საია), ნინო ლომჯარიამ (“სამართლიანი არჩევნები“), ეკა გიგაურმა (“საერთაშორისო გამჭვირვალობა - საქართველო“), ასევე, "24 საათის" რედაქტორებმა პაატა ვეშაპიძემ და მამუკა ფაჩუაშვილმა, "ტაბულას" ჟურნალისტმა სალომე უგულავამ.
არასამთავრობო ორგანიზაციების და მედიის წარმომადგენელთა ერთი ნაწილი იმედოვნებს, რომ ეს ვიდეოკადრები ფართო საზოგადოებისთვის ცნობილი არ გახდება. თუმცა, ჟურნალისტთა მეორე ნაწილი საზოგადოებისთვის მათ ჩვენებას ემხრობა.