საზოგადოება
ღარიბაშვილი: “ნაციონალების“ ისტერიკა და აჟიოტაჟი გამოწვეულია შიშითა და პასუხისმგებლობისთვის თავის არიდების მცდელობით”
საქართველო, 28 ივნისი, საქინფორმი. საქართველოს შს მინისტრი ირაკლი ღარიბაშვილი მერიისა და საკრებულოს თანამშრომლების გუშინდელ დაკავებებზე „ნაციონალური მოძრაობის" რეაქციას გამოეხმაურა და განაცხადა, რომ როცა საქმე ეხება ძალიან მძიმე დანაშაულს, გაუგებარია, რატომ ატეხეს მათ ამხელა აჟიოტაჟი.
„გამოიკვეთა ბრალეულობა ძალიან მაღალი თანამდებობის პირებისა. დაკავებულებს შორის ფიგურირებს ორი ვიცე–მერი. მინდა აქვე ხაზგასმით აღვნიშნო, რომ საქმე ეხება ათეულობით მილიონი ლარის მითვისებას, გაფლანგვას. საუბარია 50 მილიონი ლარის მითვისებაზე, მოპარვაზე სახელმწიფო ბიუჯეტიდან. ჩემთვის გაუგებარია, რატომ ატეხეს ამხელა აჟიოტაჟი. ერთადერთი ახსნაა, რომ ეს გამოწვეულია შიშით და მცდელობით, თავი აარიდონ პასუხისმგებლობას ჩადენილი დანაშაულისთვის", - განაცხადა ღარიბაშვილმა დღეს ბათუმში მიმდინარე თავდაცვისა და უშიშროების კონფერენციაზე.
ამასთან, მისივე მტკიცებით, დაკავების პროცესი გამჭვირვალე და კანონიერი იყო.
"რაც შეეხება თვითონ დაკავების ფაქტს, გუშინდელ ინციდენტს, კიდევ ერთხელ ვადასტურებთ, რომ ეს პროცესი არ იყო პოლიტიკურად მართული. კიდევ ერთხელ ვადასტურებთ, რომ სამართალდამცველი სისტემა აბსოლუტურად გათავისუფლებულია ყოველგვარი პოლიტიკისგან", - დასძინა ღარიბაშვილმა.
