საქართველო, 11 ივლისი, საქინფორმი. 2005 წლიდან რუსეთმა, აფხაზეთის სოციალურ-ეკონომიკური განვითარების ხელშეწყობის კომპლექსური გეგმის შესაბამისად, მას 16 მილიარდ რუბლზე მეტი ფინანსური დახმარება გამოუყო (484 848 484$ 11.07.2013-ის კურსის მიხედვით - საქინფორმი), ხოლო 2013 წლის ბოლომდე კიდევ 1,1 მილიარდ რუბლს გამოუყოფს (33 333 333$ 11.07.2013-ის კურსის მიხედვით - საქინფორმი). ეს ჩრდილოეთ კავკასიის ფედერალურ ოლქში რფ-ის პრეზიდენტის სრულუფლებიანმა წარმომადგენელმა ალექსანდრ ხლოპონინმა თვითგამოცხადებულ რესპუბლიკაში ყოფნისას დაადასტურა.

აფხაზეთის ხელმძღვანელობასთან შეხვედრისას ხლოპონინმა განაცხადა, რომ რუსეთი მხარს უჭერს აფხაზეთს: “კიდევ ერთხელ მინდა გავიმეორო პრეზიდენტის (რფ ვ.ვ. პუტინის - საქინფორმი) და მთავრობის თავმჯდომარის (რფ დ.ა. მედვედევის - საქინფორმი) სიტყვები, რომ ჩვენ ყველანაირად მხარს ვუჭერთ აფხაზეთის პრეზიდენტს და მის პროფესიულ გუნდს და გავაკეთებთ ყველაფერს, რაც ჩვენზეა დამოკიდებული, რომ რესპუბლიკა რაც შეიძლება სწრაფად აღდგეს“.

თავის მხრივ, აფხაზეთის პრეზიდენტმა ალექსანდრე ანქვაბმა განაცხადა, რომ რუსეთის მიერ გამოყოფილი თანხების ხარჯვა რესპუბლიკის მთავრობის მიერ  კონტროლდება: “თქვენ იცით, რომ აფხაზეთში შექმნილია კონტროლის პალატა, იქნება საუწყებო კონტროლი და ჩვენ განწყობილი ვართ მთლიანობაში ძალზე პროდუქტიული საქმიანობისათვის“.