აქტუალური
სამართალდამცველებმა ვალეს სასაზღვრო გამშვებ პუნქტში არადეკლარირებული 100 ათასი აშშ დოლარი ამოიღეს
საქართველო, 23 ივლისი, საქინფორმი. შსს-ს სახელმწიფო უსაფრთხოების სააგენტოს და ფინანსთა სამინისტროს შემოსავლების სამსახურის საბაჟო დეპარტამენტის თანამშრომლებმა, ოპერატიული ინფორმაციის საფუძველზე ერთობლივად ჩატარებული სპეციალური ოპერაციის შედეგად, ვალეს საბაჟო გამშვებ პუნქტში არადეკლარირებული 100 ათასი აშშ დოლარი ამოიღეს.
სამართალდამცველებმა არადეკლარირებული თანხა სამგზავრო ავტობუსის დათვალიერებისას სპეციალურად მოწყობილ სამალავში აღმოაჩინეს. აღნიშნული თანხის საქართველოს ტერიტორიაზე მალულად შემოტანას ირანის ისლამური რესპუბლიკის მოქალაქე, 1971 წელს დაბადებული ჰასან ა. საბაჟოს გვერდის ავლით ცდილობდა.
ჰასან ა-ს საქართველოს საგადასახადო კოდექსის 289-ე მუხლის მე-13 ნაწილით გათვალისწინებული სასჯელი - ჯარიმა შეეფარდა და არადეკლარირებული თანხა სრულად ჩამოერთვა.
შსს-ს სახელმწიფო უსაფრთხოების სააგენტო საზღვარზე არალეგალურად გადმოტანილი არადეკლარირებული თანხის შემოტანის კონკრეტული მიზნების დასადგენად აგრძელებს მუშაობას.
