პოლიტიკა
მანანა კობახიძე: “ხომ არ გახდნენ მერაბიშვილი და ახალაია ცოცხითა და „დუბინკით“ გაუპატიურების მსხვერპლი?“
საქართველო, 31 ივლისი, საქინფორმი. გუშინ გამართულ რიგგარეშე სესიაზე პარლამენტმა სახალხო დამცველის 2012 წლის ანგარიში მოისმინა, სადაც ქვეყანაში ადამიანის უფლებათა დარღვევები, წინასაარჩევნო პერიოდში პოლიტიკური ნიშნით დაპატიმრებები, ქონების უკანონოდ ჩამორთმევა და გახმაურებელი საქმეებია აღწერილი.
პარლამენტის ვიცე-სპიკერმა მანანა კობახიძემ აღნიშნულ ანგარიშს 776-გვერდიანი „ნაციონალური“ ჯოჯოხეთი უწოდა და დაინტერესდა, შს ყოფილი მინისტრი ვანო მერაბიშვილი და თავდაცვის ყოფილი მინისტრი ბაჩო ახალაია სასჯელაღსრულების დაწესებულებაში არაადამიანური მოპყრობის მსხვერპლი ხომ არ გახდნენ.
"მაინტერესებს, ბრალდებულებს - ივანე მერაბიშვილსა და ბაჩანა ახალაიას, მსჯავრდებულ თენგიზ გუნავას და სხვებს, რომლებიც არიან გისოსებს მიღმა 2012 წლის 1 ოქტომბრის შემდეგ, აქვთ თუ არა საწოლი, ლეიბი, საბანი და ბალიში; აიძულებენ თუ არა მათ, ისაუბრონ ჩურჩულით; ხომ არ უკრძალავენ სიცილს ან რადიოს მოსმენას; აიძულებენ თუ არა, შეჭამონ ფურცელი საკუთარი ჩვენებით; აიძულებენ თუ არა, ჩაიცვან სველი ტანსაცმელი; აიძულებენ თუ არა, ეძინოთ რიგრიგობით; აიძულებენ თუ არა, მისცენ ჩვენება საკუთარი თავის ან სხვათა წინააღმდეგ; აყურებინებენ თუ არა სექსუალური ძალადობის სცენებს; ხომ არ გახდნენ ისინი, დიდი ბოდიში საზოგადოებასთან, მაგრამ ცოცხით, დუბინკით ან სხვა რაიმე საშუალებით გაუპატიურების მსხვერპლები; აიძულებენ თუ არა, თავზე ხელებდაწყობილებმა იარონ მუხლებზე ბეტონის იატაკზე ან თავი ურტყან მას. ეს არის ის პრაქტიკა, რომელიც გადმოცემულია სახალხო დამცველის 2012 წლის 776-გვერდიან ანგარიშში, რაც ნაცისტურ გერმანიას შეშურდებოდა. მე მაინტერესებს, არის თუ არა დაცული მათი უფლებები", - განაცხადა მანანა კობახიძემ.
