საზოგადოება
დვანში რუსმა სამხედროებმა ბოძები აიღეს
საქართველო, 3 ოქტომბერი, საქინფორმი. „ინფო 9“-ის ცნობით, სოფელ დვანის ზედა ნაწილიდან, სადაც კერძო პირების ნაკვეთებია განლაგებული, რუს სამხედროებს ბოძები გააქვთ. შსს–ს ანალიტიკური სამსახურის განმარტებით, აღნიშნული ბოძები დამონტაჟებული არც იყო.
შს სამინისტროში განმარტავენ, რომ აქ არსებული ნიადაგის მდგომარეობის გამო ბოძების დამონტაჟება ვერ მოხერხდა, სამხედროებს ბჟენების ჩამაგრება გაუჭირდათ. ამ დროისთვის ჯერჯერობით უცნობია, განაახლებენ თუ არა რუსი სამხედროები ბოძების ჩამაგრებას მიმდებარე ტერიტორიაზე. ადგილზე შსს-ს წარმომადგენლები იმყოფებიან და სამხედროების ქმედებებს აკვირდებიან.
მედიაში გავრცელებული ერთი ინფორმაციით, სადემარკაციო სამუშაოები აქტიური სამოქალაქო პროტესტის ფონზე უკვე მესამე დღეა შეწყვეტილია. სხვა ცნობებით კი, აღნიშნულ პერიმეტრზე ქვაღორღიანი ნიადაგია და რუსმა სამხედროებმა სამუშაოები ხელსაწყოების უკმარისობის გამო შეაჩერეს.
