საქართველო, 23 ოქტომბერი, საქინფორმი. დრო დადგა, ამდენი შეტევების შემდეგ ერთხელ მაინც ვთქვა – ბიძინა ივანიშვილს ზუსტად იმდენი წიგნი აქვს წაკითხული, რამდენიც ჯავახიშვილის პერსონაჟ ჯაყოს, - ამის შესახებ საქართველოს პრეზიდენტმა მიხეილ სააკაშვილმა ჟურნალისტებთან საუბრისას განაცხადა.

"რამდენიმე დღეში არჩევნებია საქართველოში, მე მოვისმინე პრემიერ-მინისტრ ივანიშვილის თავდასხმები ჩემზე, რაღაც მითიურ შეთითხნილ სისხლის სამართლებრივ საქმეებთან დაკავშირებით. რამდენი ხანია, თავს ვიკავებ პრემიერ-მინისტრ ივანიშვილის დახასიათებისგან, იმიტომ, რომ ეს, სხვა თუ არაფერი, ქართველი ხალხის არჩეული მთავრობაა და ჩვენ ქართველი ხალხის არჩევანს უნდა ვცეთ პატივი. მაგრამ დრო დადგა, ამდენი შეტევების შემდეგ ერთხელ მაინც ვთქვა, ამ კაცს ზუსტად იმდენი წიგნი აქვს წაკითხული, რამდენიც ჯავახიშვილის პერსონაჟ ჯაყოს და ამას, მე მგონი, ყველა ვხვდებით. მან არა მხოლოდ არ იცის არცერთი უცხო ენა, არამედ ასეთი უბადრუკი ქართული მე ცხოვრებაში არ მომისმენია, რაც ამ ქვეყნად ვცხოვრობ, როგორიც მას აქვს. ერთადერთი ენა, რომელსაც ეს კაცი ფლობს, არის "ასავალ-დასავალის" ორღობის ბინძური ჭორების ენა, რომელმაც, სხვათაშორის, არჩევნები მოაგებინა შარშან, მაგრამ ხომ არ შეიძლება, ის ფიქრობდეს, რომ ქართველი ხალხი არის ჩვეულებრივი თევზი, რომელსაც ერთი და იგივე ანკესს ჩაუგდებ და რამდენჯერმე წამოაგებ. შარშან არჩევნების წინ ხალხს უთხრეს, რომ ჩვენ - მე და ჩემმა პარტიამ ცხრა თვის ბავშვი მოვკალით, ეს ხომ ბლეფია! ბედუკაძე, რომლის დადგმული კადრებით მოიგეს არჩევნები, ლამის ნაციონალურ გმირად გამოაცხადეს. მე ძალიან უხერხულ მდგომარეობაში ვგრძნობ თავს იმის გამო, რომ საქართველოს ჰყავს პრემიერ-მინისტრი, რომელიც ერთი წელი არ დაუპატიჟიათ არცერთ სერიოზულ ვიზიტზე, ეს უპრეცედენტო შემთხვევაა საქართველოს ისტორიაში. საქართველოს ჰყავს პრემიერ-მინისტრი, რომელსაც მას შემდეგ, რაც საქართველოს იმიჯი ავამაღლე და წინ წავედით, დასცინის მთელი მსოფლიოს პრესა და ყველა პოლიტიკოსი. დასცინიან უკვე, აღარც ლანძღავენ და აკრიტიკებენ, საქართველოს დასცინიან, პრემიერ-მინისტრის სახელს ტალახში ათრევენ. ჩვენ გვყავს პრემიერ-მინისტრი, რომლის კომუნიკაციის ინსტრუმენტი არის სიცრუე და ორღობის ჭორები. ხვალ კიდევ რაღაც გამოვარდება, ზეგ კიდევ რაღაც გამოვარდება, რა თქმა უნდა, არჩევნების წინ. დაიწყეს იმით, რომ 19 მილიარდი მაქვს სადღაც, ეძებეს, ეძებეს და ბოლოს სკამების შესყიდვით არიან დაკავებული ჩემს ოფისში. რა 19 მილიარდი მაქვს, აგერ ჩანს. მერე გადავიდნენ იმაზე, რომ უამრავი ხალხია გამქრალი, მომკვდარი... ყველაფერს ხომ საზღვარი აქვს? ყოველდღე იქნება ახალი თემა, იქნებ მათი წარმოდგენით თევზმა ეს ანკესი გადაყლაპოს!