პოლიტიკა
აფხაზეთისა და ბულგარეთის სავაჭრო პალატებს შორის ურთიერთთანამშრომლობის მემორანდუმი გაფორმდა
საქართველო, 6 ნოემბერი, საქინფორმი. ბულგარეთის სავაჭრო–ეკონომიკური კავშირებისა და აფხაზეთის სავაჭრო-სამრეწველო პალატებს შორის ურთიერთთანამშრომლობის მემორანდუმი გაფორმდა, - ამის შესახებ ინფორმაციას ბულგარული მედია ავრცელებს. მემორანდუმს ბულგარეთის მხრიდან ხელი სტეფან სიფიანსკიმ მოაწერა, ხოლო აფხაზეთის მხრიდან – გენადი გაგულიამ. გავრცელებული ინფორმაციით, ეს ორი ორგანიზაცია ურთიერთმომგებიანი, საქმიანი ბიზნესურთიერთობების განვითარებისთვის იმუშავებს.
თავის მხრივ, საქართველოს საგარეო საქმეთა სამინისტრომ ბულგარეთის სავაჭრო პალატასა და აფხაზეთის სავაჭრო-სამრეწველო პალატას შორის გაფორმებული მემორანდუმის გამო ბულგარეთის საგარეო უწყებას მიმართა, სავაჭრო პალატას კი, რომელიც სახელმწიფო სტრუქტურა არ არის, სპეციალური ნოტით მიმართავს.
„შეხვედრა გაიმართა ბულგარეთის საგარეო საქმეთა სამინისტროში, სადაც მათ კიდევ ერთხელ დაადასტურეს ბულგარეთის მხარდაჭერა და პატივისცემა საქართველოს ტერიტორიული მთლიანობის მიმართ და დაგვპირდნენ, რომ აუცილებლად მოიძიებენ ინფორმაციას ამის შესახებ“, - აცხადებენ საგარეო საქმეთა სამინისტროში.
