აქტუალური
მაია ფანჯიკიძე: „ბულგარეთი ვილნიუსში დააყენებს საკითხს, რომ საქართველოსთვის ევროპული პერსპექტივა რეალური გახდეს“
საქართველო, 26 ნოემბერი, საქინფორმი. მომავალი წელიწადი იქნება საკმაოდ რთული და სწორედ ჩვენი პარტნიორების იმედით უნდა გადავლახოთ ის წინააღმდეგობები, – ამის შესახებ საგარეო საქმეთა მინისტრმა მაია ფანჯიკიძემ ბულგარეთის საგარეო საქმეთა მინისტრ კრისტიან ვიგენინთან შეხვედრის შემდეგ განაცხადა.
“ბულგარეთი საქართველოს ევროპულ და ევროატლანტიკურ ინტეგრაციას ყველა დონეზე უჭერს მხარს, რაც მნიშვნელოვანი და აუცილებელია ჩვენთვის. გარდა ამისა, ბულგარეთი მხარს უჭერს საქართველოს ტერიტორიულ მთლიანობასა და სუვერენიტეტს, ლტოლვილთა და იძულებით გადაადგილებულ პირთა შესახებ რეზოლუციას გაეროში, 14 მონიტორით არის ევროკავშირის სადამკვირვებლო მისიის ერთ-ერთი ყველაზე დიდი კონტრიბუტორი. ბულგარეთი არის ჩვენი მეგობარი ქვეყანა, რომელიც ვილნიუსში დააყენებს საკითხს იმის თაობაზე, რომ ვილნიუსის დეკლარაციაში საქართველოსთვის ევროპული პერსპექტივა გახდეს რეალური”, – განაცხადა მაია ფანჯიკიძემ.
ბულგარეთის საგარეო საქმეთა მინისტრ კრისტიან ვიგენინის განცხადებით, ბულგარეთი მხარს უჭერს ასოცირების შეთანხმების ინიცირებას და მომავალშიც გულმოდგინედ იმუშავებს მის ხელმოწერასა და რატიფიკაციაზე.
