საქართველო, 28 იანვარი, საქინფორმი. საქართველოს პრემიერ–მინისტრ ირაკლი ღარიბაშვილის ხელმძღვანელობით სახელმწიფო კანცელარიაში მთავრობის სხდომა გაიმართა. სხდომის დაწყებამდე პრემიერ–მინისტრი დაინტერესდა, ვინ განუცხადა მისი სახელით ტელეკომპანია „მაესტროს“, თითქოს ირაკლი ღარიბაშვილი მხოლოდ რეიტინგულ არხებს სტუმრობს. მანვე მთავრობის კანცელარიის უფროსს და საზოგადოებასთან კომუნიკაციის დეპარტამენტის ხელმძღვანელს დაავალა, შეისწავლონ ეს საკითხი და მოახდინონ სათანადო რეაგირება. „მინდა განვაცხადო, რომ მე არ ვასხვავებ არც ერთ ტელევიზიას, არც ერთ მედიასაშუალებას ერთმანეთისგან და დიდ პატივს ვცემ მედიას და ვაფასებ მათ შრომას“, – აღნიშნა ირაკლი ღარიბაშვილმა.

პრემიერმა სხდომის დასაწყისში, ასევე, ისაუბრა ორ მნიშვნელოვან თემაზე, რომლებიც დღევანდელ მთავრობის სხდომაზე განიხილება. საქმე ეხება სახელმწიფო ავტოპარკის გადანაწილების, კლასიფიკაციისა და სამსახურებრივი ავტომანქანის შესყიდვის ან ჩანაცვლების წესის დამტკიცებას. როგორც ირაკლი ღარიბაშვილმა აღნიშნა, ამიერიდან წერტილი დაესმება იმ მანკიერ პრაქტიკას, რომელიც  წინა ხელისუფლებამ დაამკვიდრა.

მანვე ილაპარაკა კანონპროექტზე, რომლის ინიციატორია  შერიგებისა და სამოქალაქო თანასწორობის სამინისტრო. საუბარია „საქართველოში არსებული რელიგიური გაერთიანებებისათვის საბჭოთა ტოტალიტარული რეჟიმის დროს მიყენებული ზიანის ნაწილობრივ ანაზღაურებასთან დაკავშირებული ზოგიერთი ღონისძიების განხორციელების წესის“ დამტკიცებაზე. პრემიერ–მინისტრის განმარტებით, ახალი ხელისუფლების პირობებში რელიგიური უმცირესობების მიმართულებით ბევრი წინგადადგმული ნაბიჯია, მათ შორის არის დღევანდელი გადაწყვეტილებაც.